Selmana de les Lletres Asturianes

“Ye’l momentu d’entamar a plantegar con seriedá la necesidá de reformar l’Estatutu”, insiste Podemos

|
Rafael Palacios, Nuria Rodríguez, Daniel Ripa y Ricardo Menéndez Salmón (diputaos Podemos)

“Esta llexislatura tien que ser la de la oficialidá; tenemos la oportunidá de xuntar fuercies p’afitar un derechu democráticu y celebrar la bayura cultural d’Asturies”, espresó Podemos nuna declaración política a les puertes de la celebración de la XLII Selmana de les Lletres Asturianu. “Ésti ye’l momentu”, apuntó.

“Defender la democracia ye defender la llingua asturiana y el gallego-asturiano” espresaron los diputaos de Daniel Ripa, Nuria Rodríguez López, Rafael Palacios y Ricardo Menéndez Salmón na plaza la Escandalera, frente a la Xunta Xeneral. El secretariu xeneral del partíu encargóse de lleer la declaración que tien el so niciu nel “ataque sistemáticu de la ultraderecha y los sos cómplices contra los derechos y contra la democracia”, del que nun se llibra Asturies, con aiciones contra “sedes de los partíos y de les organizaciones sociales”.

“Tamién la llingua asturiana ta nel puntu de mira de los intolerantes, con VOX a la cabeza de los discursos d’odiu contra les señes d’identidá d’Asturies y el so patrimoniu cultural. Desgraciadamente, na Xunta Xeneral hailos que se plieguen énte esta estratexa, bien por convicción, bien por oportunidá”, siguió Ripa poco enantes del aconceyamientu de la Xunta de Voceros nos que se diba a tratar la propuesta de la FSA qu’obligaba a l’autotraducción a los diputaos qu’usaren l’asturianu nel casu de qu’otru parllamentariu dixera nun entender l’idioma, opción que Podemos refuga dafechu por ser un recorte de derechos que-y sigue’l xuegu a la ultraderecha.

“Nesi sen nun podemos callar, nin nel Parlamentu asturianu, nin na sociedá. Tenemos que llevantar la voz en defensa del asturianu y del gallego-asturiano. Dambes llingües van sobrevivir a los ataques de VOX, porque tán nel raigañu d’esta tierra y de la so xente. La Selmana de les Lletres va volver a demostrar qu’Asturies ye diversa y plurillingüe, que ta arguyosa del so llegáu y que tien claro que ye’l momentu d’avanzar”, rescampló’l diputáu, que considera que “esta llexislatura tien que ser la de la oficialidá; tenemos la oportunidá de xuntar fuercies p’afitar un derechu democráticu y celebrar la bayura cultural d’Asturies”.

Poro, llama a dar pasos hacia una reforma del Estatutu d’Autonomía “que nos permita blindar los derechos sociales, ampliar la nuestra capacidá d’autogobiernu y, en definitiva, afondar na calidá de la democracia”. “La reacción indignada de la mayoría de la sociedá ente la violencia de la ultraderecha tien que se treslladar al conxuntu de los partíos democáticos; defender los derechos sociales y les llibertaes ye dici-y ‘basta al fascismu’”, espresa Ripa, que considera que “defender l’asturianu y el gallego-asturiano tien que xunir a tolos partíos que refuguen la violencia y los discursos d’odiu; frente a la intolerancia d’unos pocos, el respetu a la pluralidá d’una sociedá arguyosa de la so identidá y del so patrimoniu cultural”.

Ye por esto qu’apunta que, “a los 27 diputaos y diputaes que yá se manifestaren a favor d’aprobar la oficialidá, tenemos qu’axuntar el sofitu de toles persones qu’entienden que la democracia nun puede almitir xantaxes nin amenaces”. “Defender la democracia ye defender la llingua asturiana y el gallego-asturiano. Ye rechazar cualquier discriminación o impedimentu pa’l que quiera falar la nuestra llingua en la Xunta Xeneral. Por eso, hai que comenzar los trabayos pa reformar l'Estatutu d'Autonomía. Ye’l momentu. Ye la hora de la oficialidá”, finó.

Busca del mayor consensu

Palacios, llueu de la llectura de la declaración política, añadió que “lo que venimos reclamando dende’l grupu parllamentariu de Podemos Asturies ye que nos sentemos. Llevamos meses realmente plantegando una voluntá de renovar y de tresformar l’Estatutu, non sólo pola oficialidá de la llingua asturiana, sinón tamién pa blindar derechos sociales”. “Nun podemos perder más tiempu”, siguió’l diputáu, que fai un llamamientu “a tolos grupos democráticos –hai ún que s’escluye, que ye VOX– pa qu’abramos esti alderique” y se busque “el mayor consensu”.

“Ye’l momentu d’entamar a plantegar con seriedá la necesidá de reformar l’Estatutu”, insistió, “amás nun momentu nel que sentimos como s’intenta, por parte de la ultraderecha y el fascismu, dinamitar cualquier ponte y cualquier procesu de construcción democrática n’Asturies, que ye necesario. Hai derechos qu’hai que reconocer n’Asturies”.

Sobre l’usu del asturianu na Xunta Xeneral, que se diba tratar darréu na Xunta de Voceros, Palacios rescampló que dende’l so grupu parllamentariu “venimos utilizando con normalidá l’asturianu y el gallego-asturiano nes sesiones parllamentaries y respetamos la utilización que faigan el restu de grupos. Paeznos qu’esto nun ye una cuestión nel que s’alderica entender o nun entender; esto ye una cuestión d’intolerancia y d’intentar dinamitar un procesu de normalización”.

Recordó que, hasta la llegada de VOX, nun hebo problema nengún con esta cuestión, y señaló que Podemos treslladó al restu de grupos “que nun se pue discriminar, castigar nin penalizar la utilización y l’usu con normalidá de la llingua asturiana y del gallego-asturiano na Xunta Xeneral”.

Na semeya, Palacios, Rodríguez López, Ripa y Menéndez Salmón.

Contador Estadistiques