Yates sal d'Asturies como líder de La Vuelta

|
Yates sal d'Asturies como líder de La Vuelta

El británicu ganó en Les Praeres y el francés Pinot en Los Llagos. El xixonés García Cortina llegó a Cuadonga en solitariu, pero los favoritos coyéronlu enantes de La Güesera.

La Vuelta aportó a Asturies el vienres col sorprendente Jesús Herrada (Cofidis) como líder, posición que consiguiría aguantar en La Camperona, pero Simon Philips Yates recuperaría'l maillot coloráu'l sábadu en Les Praeres, ascensión inédita y primer de les dos finales d'etapa asturianes d'esta edición de la carrera. El del Mitchelton-Scott fadríalo amás a lo grande, ganando na cima naveta nuna gran tarde de ciclismu na qu'Iván García Cortina consiguió metese nuna escapada.

Tornaría a ser protagonista l'asturianu ayeri na etapa con final en Los Llagos, comenzado la histórica xuba en solitariu como cabeza de carrera. Sicasí, les fuercies nun-y llegaron al mozu ciclista del Bahrain-Merida, siendo superáu pol grupu de favoritos a la puerta de La Güesera.

El que menos opciones tenía na xeneral, Thibaut Pinot (Groupama-FDJ) llevaría finalmente'l trunfu, consiguiendo asina ganar etapes nes trés grandes vueltes. Ente Yates y el francés, sétimu clasificáu, hai 2 minutos y 10 segundos, con Alejandro Valverde (Movistar), Nairo Quintana (Movistar) y Miguel Ángel López Moreno (Astana), a menos d'un minutu del líder cuando La Vuelta encara la selmana cabera.

Semeya: Iván G. Cortina subiendo a Les Praeres

Contador Estadistiques