Yá tenemos los tres finalistes del concursu

Dempués del recuentu de los más de quinientos votos recibíos yá podemos dar anuncia del tríu finalista nel concursu d'Asturies.com.

El primeru de los trés cantares escoyíos pol públicu d'Asturies.com ye "Brañas d'Antanu" de "Gatos del Fornu", que foi'l cantar que más votos recibió, 170. Enxertu nel primer discu del grupu "Brañas d'antanu" tien lletra basada en parte nun poema d'Eva González, y tien igües d'Ígor Medio y d'Alberto Ablanedo. En segundu puestu quedó'l tema "Fayeos de Mayo" del grupu "Felpeyu". Esti cantar, que recibió 123 votos, tien lletra y igües d'Ígor Medio, que tamién toca'l bouzouki nel grupu. El tercer puestu, que tuvo mui disputáu, quedó a la fin, con 75 votos, p'Anabel Santiago col tema "Al son de la lluna" que tien lletra d'Inaciu Llope. Estos son los tres cantares ente los que los nuesos llectores pueden escoyer el meyor cantar al traviés d'esti "Conceyu Abiertu" que va tar disponible hasta últimos d'esti mes.

A les puertes d'entrar nel tríu quedaron cantares como "La Canción de les piragües" de Vicente Díaz o "La Pongueta" de "Felpeyu" conxuntu qu'a puntu tuvo de repetir puestu na final. A daqué más de distancia quedó "Tejedor" con "Andolina"qu'al entamu de les votaciones parecía que diba ser la tercera pero qu'acabó descolgándose. Tamién recibieron un númberu curiosu de votos grupos pop y rock, casu de "Los Berrones" o "Mala Reputación" y dende l'occidente tamién llegó daqué sufraxu pol cantautor Rafael Lorenzo.

Dende esti momentu pue votáse ente los tres finalistes al meyor cantar n'asturianu de 2003 al traviés del "Conceyu Abiertu" que ponemos a disposición de los nuesos llectores. Esti conceyu va tar abiertu hasta'l 31 de xineru, día nel que sabremos que cantar ye'l ganador d'esti concursu organizáu por Asturies.com. A lo llargo d'esta selmana vamos dar anuncia tamién de quien son los ganadores de los llotes de regalo que vamos rifar ente tolos participantes nel concursu, a los que-yos queremos agradecer la so collaboración.