Yá furrula l'Archivu de la Música Tradicional Asturiana

Na tarde d'ayeri presentóse nel Muséu del Pueblu d'Asturies en Xixón l'Archivu de la Música Tradicional Asturiana.

Esti ye un proyectu qu'arrancó nel añu 2001 entamáu pol Muséu del Pueblu d'Asturies al traviés del Muséu de la gaita. Na presentación del archivu tuvieron presentes Fernando Ornosa, conocíu investigador del folclor asturianu y que foi un de los impulsores d'esti proyectu, José Manuel Fraile Gil, ún de los más importantes folcloristes españoles y que cedió les partes del so archivu personal que tenía cincantes a Asturies, Ana Rodríguez Navarro, directora xeneral de cultura en funciones de la Conseyería de Cultura del Principáu d'Asturies, y Mercedes González Álvarez, conceyala de cultura en funciones del Conceyu Xixón.

Na presentación, el responsable del proyectu Fernando Ornosa destacó la collaboración de munchos colectivos y persones que de forma desinteresada cedieron al archivu los materiales que teníen recoyíos, anque tamién llamentó la falta d'enfotu por parte d'otres persones y entidaes, y espresó'l so deséu de que nun futuru dexen que l'archivu pueda acceder a los materiales que por agora-yos negaron.

L'Archivu hasta esti momentu dedicóse a compilar materiales esparcíos per munchos pequeños archivos, pasando depués a duplicar los documentos sonoros y pasalos a formatu dixital. Agora mesmo dispón de 1.000 rexistros sonoros en distintos soportes, qu'a partir d'agora hai que catalogar y clasificar, ya que desconozse cuantes cantares y pieces instrumentales tien caún de los rexistros sonoros.

Al mesmu tiempu tamién ta trabayándose na ellaboración d'un fondu fonográficu del archivu, faciéndose con una importante colección de discos de pizarra, cilindros de cera, vinilos y soportes dixitales. Hasta esti momentu ya hai 1.500 rexistros compilaos. Nesti puntu hai que destacar que gracies a esti archivu ta conservándose ún de los archivos personales más importantes d'Asturies como ye'l del conocíu "Javi'l d'Arroes". Esti aficionáu a la música asturiana lleva más de trenta años grabando concursos de tonada, actuaciones de gaiteros, ...etc, colo qu'adulces foi faciendo un mui interesante archivu personal, qu'agora pue pasase a soporte dixital pa una meyor conservación d'esta auténtica ayalga.