Xune comenta dellos aspectos de la música asturiana

Esta selmana falamos con Xune Elipe Raposo sobre la polémica
cola SGAE d'Asturies y los proyectos de la so discográfica.



Xune Elipe Raposo ye cantante del grupu "Dixebra", amás
d'ún de los responsables de la discográfica
"L'Aguañaz". Dende la
so posición y esperiencia ye bien interesante conocer la so
opinión de la polémica que saltó a los medios esta selmana
cola esclusión, una vegada más, del asturianu de los premios de
la música. En principio, el premio al "Meyor Cantar
n'Asturianu" yera una propuesta que diba presentar la SGAE d'Asturies,
Galicia y Cantabria a l'Academia de les Ciencies y les Artes de Madrid,
organizadora de los Premios de la Música. Según nos
comentó Xune Elipe esto ye daqué que'l delegáu n'Asturies
de la SGAE Javier Vidal prometió nuna
rueda de prensa onde él mesmo taba. Una añu más tarde
salen les categoríes pa los Premios de la Música d'esti
añu, y l'asturianu vuelve a nun apaecer. Xune cométanos que
namás ver que la categoría de "Meyor Cantar
n'Asturianu" nun taba llamó a l'Academia de les Artes y les
Ciencies en Madrid pa entrugar por qué nun s'incluyera. La rempuesta que
recibió ye qu'hai nun sabíen un res de lo que taba diciendo, y
'qu'ellos en nun recibieran petición alguna. Na delegación de la
SGAE n'Asturies nun respuenden a entrugues sobre esti tema, como pudimos
comprobar esti mesmo diariu cuando llamamos a la SGAE d'Asturies, que nun da
versión oficial y nos remitieron al gabinete de prensa en Madrid.



Énte esta situación Xune Elipe Raposo entrúgase,
¿Quién miente equí?. O bien la SGAE d'Asturies nunca nun
pidió a Madrid la creación d'esta categoría, o l'Academia
nun quixo atender la petición de los autores asturianos, petición
que per otra permiten perfectamente les bases d'estos Premios, y que
sedría una bona manera de da-y promoción a la bayurosa
producción de música que ta faciéndose n'Asturianu. Pa
intentar que nun futuru pueda creáse esta categoría Xune Elipe
anunció la redacción d'un manifiestu que firmaríen
músicos y xente rellacionao cola industria musical asturiana. Esti
manifiestu mandaríase a l'Academia de les Artes y les Ciencies y la SGAE
d'Asturies. Per otru llau, nun planu más políticu, el conseyeru
de Xusticia Francisco Javier García Valledor mandó esta selmana
cartes al director de la SGAE en Madrid, Teddy Bautista, y al cantante y
miembru destacáu de la Sociedá Xeneral d'Autores Víctor
Manuel San José. Xune Elipe Raposo tamién anunció
reuniones col gobiernu asturianu pa qu'apoye esta petición, y nun
descartó la posibilidá d'acudir al defensor del pueblu.



Tamién pudimos falar col responsable de
"L'Aguañaz" de los proyectos de la discográfica. Una
nueva edición del Anuariu de la Música Asturiana, que va salir a
priemros d'avientu y que va volver a tener artículos, alcordances a
músicos desparecios esti añu, comentarios sobre discos y dalguna
sorpresa más. En cuanto a discos comentónos que ta a piques de
salir el primer discu de "Cavecanen", pal mes qu'entra va tar llisto
"Dixebra, cróniques d'un Pueblu" proyectu qu'axunta un llibru
sobre la historia de Dixebra y un discu con versiones inédites, samplers
y remixes de cantares de la banda. Amás tamién ta a piques de
salir un cd conmemorativu del décimu aniversariu de L'Aguañaz,
con grabaciones inédites y remixes. Nesti discu vamos poder volver
escuchar otra vegada a "Balandrán", que xuntóse pa
grabar una cantar pa esti discu, un cantar nuevo d'Anabel Santiago y el
debú en solitario d'Ambás, amás d'otres aportaciones. Pa
más p'alantre ta preparándose un compilatoriu de rock n'asturianu
con bandes como OI N'AST!, Güerku, o Skontra. Y pa la primavera del
añu qu'entra ta previsto que grabé'l grupu ayerán
"Tarañu".



P'acabar "Dixebra" ta pensando yá nun nuevu discu, pero
por agora nun tienen feches na cabeza, poro quieren trabayar con
tranquilidá y con tiempu lo que va ser un nuevu trabayu del los
avilesinos. Dende Asturies.com vamos dar anuncia de toos y caún d'estos
proyectos.