Xuiciu pol despidu del director de la Central Llechera

La llucha pol poder dientro de la Central Llechera Asturiana vivió esta mañana un episodiu nuevu col xuiciu que se celebró a les diez media de la mañana pol despidu de José Luis Antuña, ex-director de la empresa y d'Arcadio Quintana, ex-subdirector de la Central. Ganaderos y socios de la cooperativa anunciaron que diben concentrase énte la maxistratura de trabayu en sofitu a los dos despedíos y contra la política empresarial de Pedro Astals y del fundador de la cooperativa Jesús Sáenz de Miera.

El despidu de los dos directivos alcordolu'l Conseyu d'alministración de la Corporación Alimentaría Peñasanta (CAPSA) a propuesta de Pedro Astals el 17 de marzu d'esti añu. Astals punxo a los dos directivos de responsables na crisis interna na compañía, acusándolos formalmente de desllealtá cola empresa. Lo mesmo Antuña que Quintana son dos persones que lleven de vieyo nel grupu, ocupándose Quintana del departamentu de recursos llecheros y de la loxística primero de que'l mesmu Astals lu punxere de subdirector, mientres qu'Antuña llevaba tamién más de venti años en cargos de responsabilidá na empresa

La Central Llechera tien anguaño 9.000 socios, 7.000 d'ellos inactivos y 2.000 produciendo lleche, pero estos nun aporten más que'l 30% de los más de mil millones de llitros que cuenta con procesar esti añu la corporación, que da trabayu a 1.400 persones. Pa facese una idega del volume de producción que tien la compañía, solo de la planta de Granda (Siero) salen tolos meses 250 contenedores de tren con destinos per tola península.