Xuba del petróleu

Les tensiones en Venezuela, ún de los principales productores d'oru prieto, tiraron p'arriba pel preciu del barril. Asina la selmana pasada el preciu d'esta materia prima tuvo una xuba mui abultada hasta los 37 $ barril nos Estaos Xuníos mentantu que'l barril Brent asitióse nos 33 dólares. Nos mercaos bursátiles hebo xubes xeneralizaes. El mal datu d'emplegu nos Estaos Xuníos estró de duldes los mercaos, pero l'enfotu de la comunidá inversora tornó los índices bursátiles en positivo. L'euru foi otru gran beneficiáu.

El probetayu resultáu del emplegu nos Estaos Xuníos enfrió sobremanera les bones espectatives que teníen los analistes. Ello ye que'l Departamentu de Trabayu USA dio anuncia de la creación de 21.000 puestos de trabayu cuando se contaba con 130.000. La tasa de desempléu caltúvose nel 5,6%. Con too y con ello al final los mercaos aguantaron y pudieron pesllar los más d'ellos en positivo. Otros datos foron los costes llaborales na Zona Euru (+2,4%) y la producción industrial nel Estáu Español (-2,9%).

El mal datu del emplegu fizo que les bolses norteamericanes pesllaren con un resultáu mistu: l'índiz Dow Jones tuvo una xuba mínima del 0,07% hasta los 10.595,95 puntos mentantu que'l tecnolóxicu Nasdaq trancó con una cayida del 0,36% (2.047,63 puntos). Nel Continente Vieyu el vienres terminó con cayíes anque los parqués aguantaron les males anuncies.

L'Ibex tuvo xubes los cinco díes de la selmana, colo que caltién la tendencia. Los 8.346 puntos nel selectivu con que se peslló'l vienres marquen una nueva etapa d'esperances pa la comunidá inversora. De fechu, la xuba del Ibex nel conxuntu de la selmana foi del 1,17%. El volume de negociu sigue siendo bonu, penriba los 2.000 millones d'euros. La estrella foi Acerinox con una xuba penriba'l 2,5%. Nel llau de les ganancies destacaron tamién Sogecable, Unión Fenosa, Bankinter y Banesto. Ente les perdes tuvieron Arcelor y NH Hoteles. El Grupu Telefónica nun tuvo una bona selmana: la matriz foi de menos a más y TPI tuvo una cayida grande dempués del calentón d'hai dos selmanes. L'anuncia de la selmana foi la compra por parte de Telefónica de los activos de Bellsouth en Llatinoamérica. Asina Telefónica conviértese nel líder indiscutible de la rexón. Ente los bilordios de la selmana llama l'atención el que pon al ministru d'Economía español, Rodrigo Rato, pueda ocupar l'asientu de presidente del Fondu Monetariu Internacional (FMI).

L'euru asitióse nos 1,24 dólares. La consolidación de la moneda europea nos mercaos como divisa fuerte ye yá un fechu, anque'l dólar entamó hai yá tres selmanes un intentu de recuperar parte de lo perdío. Asina la moneda norteamericana ta intentando menguar la distancia col euru nun intentu d'equilibrar el volátil mercáu de divises.

Nel mercáu de renta fixo los bonos d'Estaos Xuníos medraron con una xuba que nun se vía dende'l 2001. A la contra, les posibilidaes de cayíes nos tipos d'interés na Zona Euru tiraron p'abaxu pel bonu alemán. La presión d'Alemaña y de Francia fai que la cayida de tipos a curtiu plazo nel Bancu Central Européu (BCE) seya más que probable.

A lo llargo de la última selmana el preciu del crudu tuvo una xuba mui significativa gracies a la política restrictiva de la OPEP y al déficit de reserves enerxétiques nos Estaos Xuníos. Pero foi la inestabilidá política en Venezuela la que nun-yos prestó a inversores y brokers. Les manifestaciones violentes en Caracas y la dimisión del embaxador venezolanu na ONU llevaron el preciu del petróleu a un rally alcista que tien mala torna. Otramiente l'oru tuvo una selmana positiva terminando nos 400 dólares onza.