Xuan Xosé Sánchez Vicente recibe esti Día de les Lletres el II Premiu Nacional de Lliteratura Asturiana
- “El Día de les Lletres instituyóse como una xornada de reivindicación llingüística y cultural”, recuerda García Arias
- Xuan Xosé Sánchez Vicente, II Premiu Nacional de Lliteratura Asturiana “pola so trayeutoria intelectual y lliteraria”
- Sánchez Vicente: “Los que quieran escribir n’asturianu deberíen saber casi de memoria los nuesos clásicos”
- Rodríguez Medina, académicu correspondiente nuevu de l’ALLA
- González Riaño pide a los partíos “un alcuerdu de mínimos sobre’l modelu xurídicu d’oficialización del asturianu y de la fala del Navia-Eo”
- L'antoloxía de Xuan Xosé Sánchez Vicente, disponible de baldre en delles llibreríes
|
1 Ochobre, 2020 por Pablo R. Guardado
- Inicie sesión o rexístrese pa espublizar comentarios
Esti vienres, per primer vegada en seronda, celébrase’l Día de les Lletres Asturianes. L’Academia de la Llingua Asturiana entrega nuna Xunta Estraordinaria marcada pola pandemia de COVID-19 el II Premiu Nacional de Lliteratura Asturiana a Xuan Xosé Sánchez Vicente y recibe a Pablo Rodríguez Medina como académicu.
L’actu que tien como sede de manera habitual el Teatru Campoamor pela tarde, treslládase al meudía al Aula Magna del Edificiu Históricu de la Universidá d’Uviéu, con un aforu reducíu. Sonia Avellaneda y Próspero Morán van repetir como presentadores d’un actu más sobriu, pero cargáu de conteníu.
César Gracia va abrir cola so gaita la Xunta Estraordinaria, na que Rodríguez Medina va ser recibíu como académicu correspondiente. “El so currículu lliterariu, nel primer nivel de les lletres asturianes, ta compuestu d'obres de gran valir nos tres grandes xéneros, lo que-y fixo collechar bien de premios del mayor prestixu, igual en narrativa, qu'en poesía y en teatru. Amás del so llabor creativu, l'ALLA quixo sorrayar la importancia de la so contribución pedagóxica, que vien exercitando nel ámbitu regláu como profesor funcionariu de Secundaria y tamién como docente, dende cuantayá, de la Universidá Asturiana de Branu”, espliquen dende la institución académica.
Sánchez Vicente va recoyer darréu’l II Premiu Nacional de Lliteratura, gallardón de calter triañal qu’estrenó nel 2017 Xuan Bello. “La so trayeutoria inteleutual y lliteraria conviértenlu nun referente y nun de los mayores activos de la lliteratura asturiana. Amás de cultivar con aciertu tolos xéneros (poesía, narrativa, teatru, ensayu), abrió caminos nuevos pa lallingua a partir d'un fondu conocimientu y respetu pola tradición, que foi de los primeros n'estudiar y asoleyar. Figura clave del canon lliterariu asturianu, tamién resulten indispensables les sos contribuciones crítiques a la hora d'establecer y consolidar esi mesmu canon”, emponderen.
Xosé Antón González Riaño, presidente de l’ALLA, va entregar al xixonés la medaya conmemorativa. La institución asoleya tamién una antoloxía de la obra lliteraria y filolóxica del tamién académicu, con poesía, teatru, novela, cuentu, estudios lliterarios y llingüísticos.
Presencia del presidente Barbón
Tres el siempre esperáu discursu institucional pola XLI Día de les Lletres Asturianes, nel que, “acordies cola actualidá sanitaria y socio-política, va facese una reflexón fonda sobre'l presente y el futuru de la llingua asturiana”, Avellaneda y Morán van recitar pieces asoleyaes nel númberu 36 de la revista ‘Lliteratura’ que se presenta. Gracia va poner el pieslle musical col himnu del país.
A la Xunta Estraordinaria van acudir les máximes autoridaes en representación de los ámbitos académicu, cultural, políticu y sindical d'Asturies, destacando la presencia un añu más del socialista Adrián Barbón, agora como presidente del Gobiernu, dalgo que nun se daba dende tiempos de Pedro de Silva. Según informa l’ALLA, la RTPA va tresmitir en direuto l’actu, que tamién se va poder siguir na canal de YouTube de la Universidá d'Uviéu.
Efrén d'Andrés
Lo + visto de la selmana
