Xuan bello publica en castellanu

Col títulu Historia Universal de Paniceiros, la editorial madrileña Debate ta acabante de sacar a les llibreríes de tol Reinu una edición especial en castellanu de la obra de Xuan Bello, que recopila dello de lo meyor de la obra lliteraria del poeta de Paniceiros asoleyada previamente n'asturianu, xunto con otro inéditu. El llibru, como bien indica'l títulu podía definise como una güeyada a los temes universales dende lo más íntimo y local, meciendo historia real y fantasía, la prosa y lo poético, asina como un exerciciu d'estilu y una proclama estética que ruempe col mitu de la oposición ente cultura universal y cultura asturiana, que se presentes como cares d'una mesma realidá. Realidá dacuando suañada, pero siempre cotidiana y próxima.

Xunto col llibru entrégase otru de baldre, una especia de guía secreta pa entender "Paniceiros", que nun ye sólo'l llugar onde nació l'autor, sinón el referente míticu constante pa ubicar la obra del que ye ensin dulda ún de los meyores escritores actuales na nuestra llingua.

La publicación de Historia Universal de Paniceiros ye importante tamién por llevar al ámbitu de tol Estáu una realidá desconocida como ye la lliteratura en llingua asturiana y proponer la nuestra peculiar visión de la realidá dende la esistencia d'una cultura propia pero sistemáticamente inorada dientro y fuera d'Asturies.

Contador Estadistiques