Xornaes, cursos y conciertos pal fin de selmana

Esti fin de selmana coinciden delles actividaes rellacionaes cola música tradicional n'Asturies.

En Grao va haber un cursu de curdión diatónicu a cargu del curdionista vascu Joseba Tapia. Joseba ye ún de los músicos de curdión de más reconocencia n'Euskadi y en tol estáu, aplicando a lo llargo de la so carrera musical la trikitixa, nome del curdión vascu, a munchos estilos musicales, dende la musica tradicional hasta'l jazz. Esti cursu ta organizáu pola recién creada "Asociación Cultural de Curdionistas de Botón Diatónicu d'Asturies", que va facer la so presentación oficial durante esti cursu, más concretamente'l sábadu a les 18:00 hores na casa la cultura de Grao. Les actividaes d'esti cursu van completase con una nueche folk el sábadu pela nueche a eso de les 22:30, nella van actuar el curdionista asturianu Xuan Nel Expósito y el gaiteru Milio Martínez, Joseba Tapia acompañáu pola so banda y pa finar "N'Arba".

Pal oriente d'Asturies lo que podemos alcontrar son unes xornaes empobinaes al estudiu del documentu escritu más antigüu qu'esiste n'Asturies, celebrando asina'l mil doscientos aniversariu d'esti testu con fecha del añu 803 nel qu'una muyer nomada Faquilo dexa en manda la ilesia de Santa María de Liberdonem (Lliberdón). Los actos entamen a les 17:30 con una charra sobre esta donación a cargu de María Josefa Sanz, Directora del Departamentu d'Historia de la Facultá, n'Uviéu. P'ambientar estes charres va tar presente la música de Daniel García de la Cuesta y LLuis Gómez de Benito, miembros del grupu folk "Lliberdón", que van facer un conciertu de música medieval y tradicional con harpa, zanfona, bandurria y xiblates. L'actu finará con otra charra sobre la ilesia altu medieval del Santa María de LLiberdón y el prerrománicu asturianu, a cargu d'Isabel Ruiz de la Peña, profesora asociada de la Facultá d'Historia, n'Uviéu. Tolos actos d'estes xornaes van ser nel Hotel Palaciu de Lliberdón de Colunga