Xixón va acoyer un ATP 250 nel mes d'ochobre

|
Gijón Open ATP 250

Pablo Carreño y Roberto Bautista, primeros tenistes confirmaos nesti tornéu que va tener el Palaciu de Deportes como pista central.

El Comité de Dirección de l'Association of Tennis Professionals (ATP), presidíu pol italianu Andrea Gaudenzi, concedió a la Real Federación Española de Tenis (RFET) la organización d'una competición de categoría 250, el cuartu de mayor nivel depués de los cuatro Grand Slam, los 9 Masters 1.000 y los 13 ATP 500, pola suspensión del de Moscú pola invasión rusa a Ucraína y la cayida de la xira china poles restricciones sanitaries pola COVID-19. Xixón ye la ciudá escoyida p'acoyer esti tornéu.

La celebración del Gijón Open, nome que va tener la competición incumpliendo asina la llegalidá toponímica, va tener llugar del 8 al 16 d'ochobre y les primeres confirmaciones son el xixonés Carreño y el castellonense Bautista. Neses mesmes feches va tener llugar otru ATP 250 en Firenze, tamién en pista dura cubierta, y los previos van ser los ATP 500 de Tokiu y Nur-Sultan, nome nuevu d'Astaná, del 3 al 9 d'esi mes.

Los otros cuatro torneos qu'incorpora l'ATP al calendariu con llicencia d'un añu son San Diego, Seúl, Tel Aviv y Napule.

 

Contador Estadistiques