Xixón, Tapia, El Franco, Cuaña y Muros van poder plantar pataca

|
Begoña López xunta en Madrid poliya guatemaliana

El Gobiernu va llevantar a últimos d’esti mes la prohibición de plantar pataca en cinco conceyos por mor de la presencia de la poliya guatemaliana. Xixón, Tapia, El Franco, Cuaña y Muros son los beneficiaos, pasando a ser ‘conceyos tampón’ de la plaga, mentes qu’otros ocho, toos del occidente, siguen con restricciones.

La direutora xeneral de Desarrollu Rural y Industries Agraries, María Begoña López Fernández, participó esta mañana en Madrid nuna xunta col direutor xeneral de Sanidá de Producción Agraria, Valentín Almansa, p’alcordar les midíes fitosanitaries a adoptar nel programa de desaniciu de la Tecia solanivora (poliya guatemaliana de la pataca). López esplicó que, tres analizar los datos recoyíos al traviés de la rede de trampéu en plantaciones y almacenes, el Ministeriu d’Agricultura, Pesca y Alimentación dio’l preste a la propuesta del Gobiernu de llevantar la prohibición nestos conceyos, midida previamente consensuada con Galicia.

La prohibición caltiénse nos conceyos de Cuideiru, Pravia, Navia y Valdés, cola intención de llevantala de manera progresiva cuando la evolución de la plaga asina lo permita. También sigue en Castropol, San Tiso d’Abres, Taramundi y A Veiga, nesti casu como una midida fitosanitaria especial.

Xixón, Tapia, El Franco, Cuaña y Muros pasen a ser, poro, conceyos tampón. Nellos va poder plantase pataca, pero los agricultores deberán notificar les sos plantaciones pa facer un siguimientu fitosanitariu.

Na semeya, López xunto con Almansa, a la so derecha, y téunicos de la Conseyería de Desarrollu Rural, Agroganadería y Pesca, y del Ministeriu d'Agricultura, Pesca y Alimentación.

Contador Estadistiques