Xixón sal a la cai pa sofitar a los trabayadores de Tenneco y defender l’emplegu n'Asturies

|

Los trabayadores de Tenneco solicitaron el sofitu de los ciudadanos y éstos nun fallaron. Miles de persones salieron esti xueves a la cai p’amosar el so refugu al zarru de la planta xixonesa y pa defender l’emplegu nel país.

Los 230 afeutaos pola decisión de la multinacional estauxunidense recibieron la solidaridá de diez mil persones, según les cifres que se manexaben ayeri, y de los sos compañeros de les factoríes que tien Tenneco n’Ermua y València. Amás, tamién quixeron amosar el so apoyu a esta llucha de los trabayadores de l’antigua Monroe l’alcaldesa Carmen Moriyón y los voceros de los cuatro grupos municipales, Fernando Couto (Foro), Santiago Martínez Argüelles (PSOE), Manuel Pecharromán (PP) y Jorge Espina (IX-LV) xunto con representantes d’otres formaciones polítiques. Tamién participaron tolos sindicatos y el FUSOA.

La manifestación taba prevista pa les 19 hores en L’Humedal, pero los trabayadores salieron dende la factoría minutos enantes tres una pancarta que rezaba ‘Contra el expolio tecnológico en Gijón y Asturias’. Muncha xente foi sumándose a la marcha mientres el so percorríu pela avenía Constitución, anque la mayor parte esperaba na Puerta la Villa. D’ehí, los manifestantes tomaron direición hacia la Plaza Mayor, onde’l secretariu del comité d’empresa, Isaac Pérez, agradeció l’apoyu, criticó la reforma llaboral que lleva a esti tipu de situaciones y el sistema actual, y acusó a la direición de la empresa de falsear datos.

 

Contador Estadistiques