Voz asturiana pa esti 8 de marzu

L'Institutu Asturianu de la Muyer espubliza un discu compilatoriu cola voz de cantante asturianes pa celebrar el próximu día de la muyer trabayadora.

La muyer tuvo y tien un papel perimportante na vitalidá y tresmisión de muncha de la cultura tradicional asturiana. Munches vegaes al traviés de la música yera como la muyer podía glayar al mundu una forma de vida, de participar nes vivencies de la so comunidá, de querer llevantar un poco la llabanona machista que tien enriba, o de simplemente de disfrutar cola so capacidá de sentise viva y portadora de dalgo tan importante como ye la herencia musical asturiana.

Como alcordanza y presente d'esta parte de la música asturiana sal a la cai un discu con 14 temes que falen de muyeres y cantaos por muyeres. "Al pasar pol puertu", "Tolos trabayos son", "La Soberana", "Debaxo d'una panera" son dalgunos de los cantarinos que podemos escuchar nes voces de la bien conocía Anabel Santiago, de la prometedora Marisa Valle Roso, de Liliana Castañón que ta acabante de sacar discu y de Rosario González que tamién va poco que sacó discu. El discu lleva'l títulu de "con voz de muyer", y esa ye l'auténtica protagonista del trabayu discográficu, yá que les voces d'estes cuatro maestres de la canción asturiana malpenes tien acompañamientu instrumental.