Volvió'l galipote

El galipote del Prestige entovía apaez dacuando pa recordanos que queda una cantidá más o menos indefinío d'ello flotando delantre de nosotros. Esti xueves, les playes de la Ñora, Merón, España y Rodiles en Villaviciosa amanecieron con manches de galipote, y pal occidente tamién llegó daqué de fuel a una playa de Coaña.

Sicasí, esta selmana pintó más la dimensión política del galipote que la mediuambiental. El coordinador d'Izquierda Xunida d'Asturies, Jesús Iglesias, faló de les ayudes a los conceyos afectaos pol galipote del Ministeriu de Fomentu en Corcubión, onde IX d'Asturies ta personada como acusación en dellos pleitos sobre'l fundimientu. Nes sos declaraciones, Iglesias calificó de "chantaxe inaceptable" de Fomentu pa los conceyos de la costa afectaos pol galipote del Prestige el pagu d'ayudes económiques que s'anuncien como "compensación". Según Iglesias, aceptar l'ayuda conlleva que'l conceyu arreniegue de posibles actuaciones contra l'estáu en casu de demostrase que ye corresponsable de la catástrofe. Anque los conceyos acepten llibremente les ayudes, Iglesias interepreta que la llei del déficit 0 fuerza a munchos conceyos a ceptar l'ayuda.

Fomentu nun tardó en responder al responsable d'IX. Según el ministeriu que lleva l'asturianu Álvarez Cascos, la firma d'un conveniu pa cobrar anticipadamente los daños del galipote nun pue acompañase del exerciciu d'acciones xudiciales empobinaes a esi mesmu oxetivu económicu. Fomentu entiende que l'actitú d'Iglesias ye "irresponsable" y aplica nuna cenciella ecuación. Según Fomentu, hai que condenar a los "verdaderos culpables" de la catástrofe, porque si se condena a pagar al Estáu nos tribunales, entós "pagamos toos"