Viliulfo A. Díaz y Asociados enxértase n’Iberaudit

La consultora xixonesa propiedá del abogáu, economista y auditor Viliulfo A. Díaz, ex-abogáu del Sporting de Xixón, ta acabante d´enxertase n'auditora valenciana Iberaudit. Xunta la empresa asturiana tamién entraron a formar parte d´Iberaudit delles auditores de Madrid, Navarra, Barcelona, Andalucía y Murcia. Esta operación entra dientro de los movimientos de fusiones y aliances ente auditores qu'empobina la nueva Llei Financiera. Esta llei obliga a les firmes d´auditoría a camudar l'equipu de profesionales qu'analicen les cuentes d´una empresa cada siete años, y parte del supuestu de que cola concentración d´auditores ye más cenciello caltener la cartera de clientes. El casu ye que la reforma d´esta llei qu'entamó a furrular el venticinco de payares del añu pasáu ye´l cambéu más señeru nel sector dende hai quince años.



Anguaño l'auditora Iberaudit tien presencia en más de diez ciudaes del Estáu y ye´l resultáu de la fusión de diez compañíes d´asesoría y auditoría. Nel añu 2.002 la empresa asitióse na trixesimocuarta posición de la llista de les auditores del Estáu con una facturación penriba los dos millones d´euros. Na compañía d´orixe valencianu trabayen cincuenta auditores y venti socios.