Venti años d'escolarización del asturianu

Nel cursu que faen venti años dende qu'entamó la escolarización del asturianu , el profesorau d'esta asignatura sigue ensin tener un reconocimientu xurídicu que dignifique'l trabayu y l'asignatura ye de les más abandonaes de tol sistema educativu asturianu. L'entamu de llexislatura col nuevu gobiernu parez que de momentu nun supunxo muncha meyora.

Según la responsable de llingua del sindicatu SUATEA, Marta Rivas, les declaraciones oficiales del gobiernu asturianu sobre la implantación de la escolarización del asturianu escuenden una realidá d'arrequexamientu de l'asignatura, qu'aguanta dende los años 80 torgues que dificulten enforma la xeneralización de la enseñanza de la llingua. En primer llugar, la falta d'estatus llegal del enseñante d'asturianu fuerza a que en primaria nengún mayestru d'asturianu tenga plaza acutada, lo qu'obliga tolos años a un baille de mayestros y mayestres d'unos centros a otros. Esto, aparte de ser una molestia pal profesional, tamién ye una estorbisa pa la normalización de l'asignatura, en cuantes que nin padres nin alumnos puen identificar "al mayestru d'asturianu" como ún profesor del centru.

Mientres, en secundaria, l'asturianu compite directamente como optativa con asignatures como francés o alemán de segundu idioma, lo que fuerza a los más de los padres a matricular a los fíos n'asignatures que se supón que van vale-yos más p'alcontrar trabayu'l día de mañana. Marta Rivas diz que la única manera de que l'asturianu seya una asignatura normal en secundaria nel marcu actual ye faciéndola optativa pero de verdá, esto ye con una alternativa equivalente, y pon el casu de l'asignatura de relixón, que tien por alternativa "historia del fechu y la cultura relixosa".

Amás d'estes grandes inxusticies que se repiten tolos años dende que l'asturianu entró a les escueles, SUATEA quéxase de que nel Principáu siguen ensin tener en cuenta nin afalar iniciatives normalizadores como les de rotular los centros en billingüe o manda-yos la correspondencia a los padres en catellanu y n'asturianu. En referencia a esti asuntu, la representante de Suatea quexóse de que nel entamu del cursu, cuatro meses depués de la composición del gobiernu, entovía nun haya una persona al cargu de la oficina de política llingüística,organismu del que tendríen de salir estes iniciatives énte l'apatía d'Educación.

En cuantes a les places de mayestros d'asturianu pa esti cursu, el balance Suatea fuxe de trunfalismos y diz que les places d'esti cursu vienen a ser les mesmes que l'añu pasáu, pero cola diferiencia positiva de qu'esta vez les places salieron toes a la vez, sacantes cuatro places de gallego-asturiano, dos en secundaria y otres dos en primaria, colo que nun se precisó d'andar llamando dende los sindicatos a Educación pa cubrir les que faltaben nes primeres selmanes del cursu. Con too y con ello, Marta Rivas destacó que siguen repitiéndose casos discriminatorios de centros que quedaron ensin dar l'asignatura d'asturianu porque la demanda "nun llegaba al mínimu d'alumnos esixíos".