“Vamos siguir llevando ‘Uviéu’ na camiseta porque nun ye nada illegal y tamos mui arguyoses de facelo”, afirma Martínez

|
Rosal equipu 19-20

El Conceyu insiste na so decisión d’obligar a los clubes a llevar el logu d’Uviéu col topónimu castellanizáu pa optar a subvención tres camudar les bases de la convocatoria. El Rosal ye l’únicu al que-ylo comunicaron na xustificación última y la so presidenta, María Xosé Martínez, afirma que “vamos siguir llevando ‘Uviéu’ na camiseta porque nun ye nada illegal y tamos mui arguyoses de facelo”.

L’históricu club uvieín, anguaño en segunda autonómica, recibió una indicación clara per parte de Deportes. “Comunicáronnos que pa les próximes convocatories diben escluyir de les subvenciones a los clubes que nun llevaren el logu col topónimu ‘Oviedo’”, una alvertencia que nun llegó a otres entidaes, polo que s’entiende como un ataque direutu al Rosal.

“Siempre presentamos tola documentación n’asturianu y venimos usando ‘Uviéu’ ensin problema hasta agora. Na convocatoria actual, que finó en febreru, fiximos lo mesmo”, rellata Martínez. La subvención que vien recibiendo’l Rosal ye d’una cantidá cercana a los 1.000 euros, una cantidá que nun salva la temporada, anque supón una ayuda pa un club modestu al qu’esti cambiu-y supondría “un emboláu. Tenemos les camisetes suplentes nueves y supondríanos un gastu importante mercar equipaciones nueves”.

Pase lo que pase, una cosa ta clara. “Vamos siguir llevando ‘Uviéu’ na camiseta porque nun ye nada illegal y tamos mui arguyoses de facelo”, asegura la presidenta, al tiempu que califica la decisión del equipu de gobiernu del PP y Ciudadanos de “política, pol autoodiu a tolo que tien que ver con Asturies y l’asturianu”.

Comisión de Deportes

Rubén Rosón, de Somos, llevó esti asuntu’l martes a la Comisión de Deportes. “Pidimos que nun s’escluya a naide por llevar el topónimu ‘Uviéu’”, esplicó l’edil, que recuerda que la toponimia tradicional del conceyu ye oficial.

La conceyala responsable de Polítiques Sociales y Deportes, la popular María Concepción Méndez Suárez, sicasí, nun modificó la postura del equipu de gobiernu, amosada nes bases de les dos últimes convocatories, y confirmó que pa optar a subvención los clubes habríen de llucir la forma castellanizada del conceyu. “Ye l’autoodiu que vemos en munchos perfiles, un exemplu más de cosmopaletismu”, apunta Rosón, edil tamién na anterior llexislatura cuando’l tripartitu diseño la versión asturiana del logotipu d’Uviéu.

“Vamos tar pendientes d’esta situación”, confirmó, convencíu de que’l proceder del Conceyu ye “illegal”.

Na semeya, formación del Rosal nun partíu de la temporada pasada. Na actual, pola situación sanitaria, namái tán compitiendo los equipos de categoríes estatales.

Contador Estadistiques