“Vamos facer nesta llexislatura por que se noten avances cualitativa y cuantitativamente nos puntos que cita’l Conseyu d’Europa”, asegura García

|
Antón García nel MUXA

El quintu informe del Conseyu d’Europa no que se refier al asturianu encamentaba a les autoridaes a ameyorar la ufierta n’Educación, nel usu na Alministración y na presencia del idioma nos medios. Antón García, direutor xeneral de Política Llingüística, asegura que “hai marxe de meyora en tolos puntos y vamos facer nesta llexislatura por que se noten avances cualitativa y cuantitativamente".

“La Carta Europea pa nós ye un instrumentu mui importante, ún de los puntos de la llexislación actual qu’afeuta tanto al asturianu como al gallego-asturiano”, apunta’l de Tuña. Esti mes conocióse’l quintu informe sobre’l mesmu, ellaboráu pol Comité d’Espertos de la Carta Europea de les Llingües Minoritaries o Rexonales, y asoleyáu pol Conseyu d’Europa, “que reflexa cómo taba la situación nel periodu 2014-2016”.

Nel casu del asturianu, encamienta a les autoridaes, p’ameyorar la proteición y promoción del idioma, a introducir de forma inmediata nel Estatutu d’Autonomía el términu ‘asturianu’ pa referise al mesmu, yá qu’anguaño apaez como ‘bable’. “Ye una cuestión que sigue pendiente, como la incorporación del Gallego-asturiano, que tendría qu’entrar nel Estatutu nel momentu de la reforma de la norma de la mano de la oficialidá”, apunta García.

L’informe tamién afala a “ameyorar la ufierta d’asturianu en tolos niveles educativos”, “l’usu del asturianu n’Alministración rexonal y llocal” y “l’aumentu del usu del asturianu nos medios de comunicación”. Nesti casu, el direutor xeneral reconoz que “hai marxe de meyora en tolos puntos y vamos facer nesta llexislatura por que se noten avances cualitativa y cuantitativamente", ratificando tamién "el compromisu pa col gallego-asturianos, con polítiques de promoción que se van reforciar esti 2020".

Momentu pal diálogu sosegáu

Entrugáu pola afirmación del Comité d’Espertos de que, magar l’asturianu nun ye oficial, “hai un fuerte sofitu públicu na sociedá pa facelu oficial”, García diz tar d’alcuerdu con esi sentir “que vien d’un escenariu nel que’l partíu del Gobiernu, el PSOE, apoya la oficialidá y cambiar l’Estatutu”. “Tamos nel momentu d’un diálogu sosegáu sobre’l procedimientu d’esa oficialidá”, entiende’l de Tuña, que pa depués de branu cuenta con disponer del yá anunciáu informe “que nos presente d’una manera clara y detallada qué correspuende a una futura oficialidá, los pasos necesarios y los sos ingresos y gastos”.

Contador Estadistiques