¿Va llimpiase bien la Ría d'Avilés?

énte'l proyectu de retirada de la basa contaminao que s'amontona na Ría d'Avilés, Colectivu Ecoloxista de la ciudá ta acabante de pidi-y información complementario al Conseyeru de Mediu Ambiente del Principau sobre'l tratamientu definitivu que van dá-yos a les 140.000 tonelaes de basa que cuenten sacar de los cásique dos kilómetros de ría que van tratase. L'otru añu, la Conseyeria de Mediu Ambiente informare a los ecoloxistes de que lo que veíen más conveniente yera neutralizar primero los contaminantes por inertización pa guardalos depués nun vertederu herméticu de seguranza. Según los ecoloxistes, al tenor de la información qu'apurre la Conseyería apaecen bien de duldes sobre'l métodu que va seguise pa neutralizar los contaminantes primero de llevalos al vertederu. Al paecer d'esti grupu, el vertederu d'Aceralía que va emplegase nun ta preparáu pa ser un depositu de seguranza pol diseñu que tien, que permitiría que recudiesen los contaminantes que se posaren nelli, colo que volveríen a la ría dempués de gastar cientos de millones en retiralos. N'otru orde de coses, pal colectivu avilesín ye evidente que lo que se quier ye dar facilidaes pa construyir na redolada de la ría en tiempu d'elecciones, pero nun ta faciéndose como debiere'l llabor de retiradaEl colectivu denuncia que la basa acumulao n'Avilés tien tases mui grandes de plomu, zinc, cadmiu, y PCB, el peligrosu aceite que s'usaba enantes nos tresformadores de la corriente y que ta perdemostrao que ye un potente carcinóxenu. El colectivu Ecoloxista diz que nun sedría la primer vez que se faen les coses apriesa y corriendo, y ponen el casu del polígonu industrial del PEPA, asitiáu en tarrén de l'antigua Ensidesa y onde apaecieron 20.000 tonelaes de suelu contamináu, que-yos abulta poco pa lo que tenía que ser .