Uviéu nun recicla

La capital asturiana ye, con muncho, la
ciudá onde menos basura se recicla. Nin siquiera cola campaña del
Ayuntamientu pidiendo-yos a los vecinos separtar la basura tirando papel, envases y cristal en díes distintos a reciclar son los carbayones a presentar unes tases de reciclao curioses. Xixón, Avilés o
les Cuenques ganen en recuperación de plásticos, envases y papel a la capital del Principáu, que ye un auténticu puntu escuru pa la media asturiana.

Siendo como ye la segunda ciudá del país, con 200.000 habitantes, Uviéu presenta unes medies de material entregao pa reciclar bien probetayes. Segúndatos de Cogersa, nel añu 2.002, cada uvieín entregó una media de 3,47 kilos de vidriu, 2,51 d'envases y 15,73 de papel. Xixón vien a doblar estes cifres, con 8,93 kilos de vidriu, 4,23 d'envases y 27,22 kilos de papel y cartón por habitante, mientres qu'Avilés, la tercer ciudá en númberu d'habitantes, presenta cifres asemeyaes a le de Xixón n'envases y cascos de cristal pero recicla entovía más papel, con 28,73 kilos de media por habitante. Otros conceyos importantes y altamente urbanizaos, casu de Siero, tamién perpasen los datos de la capital, pero ye que hasta dellos conceyos más ruralizaos y nos que los llabores de recoyida y colocación de contenedores nun son tan intensivos como nes ciudaes presenten cifres semeyantes a les d'Uviéu, como ye'l casu de Valdés.

Estos datos daríen pa pensar que los uvieinos son más roceanos col reciclaxe que los demás asturianos, pero hai un datu qu'esclaria el por qué d'estes cifres, y ye qu'Uviéu presenta la tasa más baxa de toa Asturies de contenedores instalaos por númberu d'habitantes. Asina, con 97 contenedores pa envases en tol conceyu, los uvieinos toquen a 2.067 vecinos por contenedor, cuatro veces más que la media, una ratio que se repite nos casos de los contenedores pa cristal y papel.

Otramiente, l'añu 2.003 promete seguir meyorando los datos de reciclao n'Asturies. Casu de repetise los datos del primer semestre, la recoyida de papel podría ser de más de 2.000 tonelaes que nel 2.002 y la de cristal podría ponese sobre 1.000 más. La recoyida d'envases ye casu aparte, en cuantes que tolos años vien creciendo esponencialmente, tendencia que va seguir esti añu nel que yá se lleven 2.597 tonelaes nos primeros seyes meses cuando nel 2.002 enteru namás se llegó a 3.347.