Uviéu-Athletic Club y Mallorca-Sporting, duelos de la Copa

|

El sortéu de dieciseisavos de final de la Copa deparó un clásicu norteñu ente l’Uviéu y l'Athletic Club. Mentes, el Sporting va vese les cares otra vuelta col Mallorca, equipu que lu eliminó nesta mesma eliminatoria l’añu pasáu.
 
L’Uviéu, al ser un sortéu dirixíu, sabía que diba a enfrentase a un rival de Primera División que compitiera en competiciones europees esta temporada, esto ye Barcelona, Real Madrid, Valencia, Villarreal, Sevilla, Athletic Club o Atlético. Al final, la bola de los vascos foi la que salió xunto cola del equipu uviedín, polo que’l Carlos Tartiere va revivir un clásicu norteñu’l 8 d’avientu que de xuru va ilusionar a munchos aficionaos azules. Amás, tres la opción del Barcelona y Madrid, la del Athletic ye la más favorable de cara a la venta d’entraes, yá que’l club roxiblancu mueve a una gran masa d’aficionaos a los sos partíos.
 
Pela so parte, el Sporting va repetir enfrentamientu col Mallorca, equipu que lu eliminó l’añu pasáu por un global de 5-3 (3-1 en Palma y 2-2 en Xixón). Nesta ocasión tamién se repite l’orde de los encuentros, yá que’l primer choque va tener llugar nel Iberostar Estadi’l 13 d’avientu y la vuelta n’El Molinón el día 21 d’esi mesmu mes. Los xixoneses tenían la opción de quedar emparexaos con un Segunda División, pero’l sortéu nun favoreció a los de Preciado nesi sen.
 
El restu d’enfrentamientos de los dieciseisavos de final de la Copa son los siguientes: Cádiz-Valencia, L’Hospitalet-FC Barcelona, Ponferradina-Real Madrid, Mirandés-Villarreal, San Roque-Sevilla, Albacete-Atlético, UD Almería-Osasuna, Alcorcón-Zaragoza, Celta-Espanyol, Córdoba-Betis, Deportivo-Levante, Racing-Rayo, Getafe-Málaga y Real Sociedad -Granada. Los partíos d’ida van celebrase’l 13 d’avientu, a esceición de L’Hospitalet-Barcelona (9 de payares) y del Uviéu-Athletic Club y Albacete-Atlético (8 d’avientu) pol Mundialitu de Clubes y enfrentamientos de la Lliga Europa, de manera respeutiva.Tolos partíos de vuelta van disputase’l 21 d’avientu.
 

Contador Estadistiques