Urban y Candy repiten trunfu nel Seya nun esprín pa la historia

Les gallegues Tania Álvarez y Tania Fernández ganaron en K-2 femenín y l'asturianu Walter Bouzán y la vasca Irati Osa en K-1.

El LXXXV Descensu Internacional del Seya prometía ser una edición emocionante y igualada, y nun defraudó. Siete piragües encararon la ponte de la ría de Ribeseya con opciones de victoria y llucharon nun vertixinosu esprín na que los más rapidos foron Quentin Urban y Jeremy Candy, vencedores l'añu pasáu, que marcaron un tiempu de 1 hora, 7 minutos y 53 segundos.

Nun foi una carrera fácil pa los palistes franceses, que tuvieron una mala salida que-yos obligó a dir gran parte de la carrera per detrás del primer grupu. Miguel Llorens y Alberto Plaza marcaron un fuerte ritmu dende l'entamu, arrastrando a trés piragües, pero foron finalmente seis les qu'aguantaron nel momentu d'encarar la recta final.

Con poca agua nel ríu y baxamar, Urban y Candy llograron posicionase bien, protagonizando una llucha espectacular colos húngaros Bruno Kolozsvari y Adrian Boros (1:07:53) y con Llorens y Plaza (1:07:55), teniendo que conformase los asturianos cola tercer plaza. Los alemanes Max Hoff y Claas Gebhardr, los más rápidos na crono, finaron octavos a cuasi un minutu de los ganadores.

Llistáu de vencedores en piragua senior

En K-2 femenín ganaron Álvarez y Fernández (1.20.04), per delantre de Eva Barrios y Amaia Osaba (1:21:30) y Miriam Vega y María Paraja (1:22:08), mentes que'l K-1 foi pa Osa (1:28:30) n'otru apretáu final con Irene Gana (1:28:32). En masculín, venció Bouzán (1:12:24) sobe Javier López González (1:12:54).

Na semeya, el podiu del K-2 masculín, con Urban y Candy no más alto lluciendo montera picona.