Unicaja Banco abandona'l patrociniu de Liberbank a equipos asturianos

|
Jeff Xavier Unicaja Banco

L'OCB conoció la noticia nos díes previos al entamu de les eliminatories pal ascensu a ACB, qu'arranquen esti xueves en Palencia. La Calzada y l'ADBA, los otros dos perxudicaos.

El deporte asturianu ye la siguiente víctima de la perda de CaxAstur cola so privatización. Si Liberbank siguía patrocinando a equipos del país, la so fusión por absorción con Unicaja l'añu pasáu, creando Unicaja Banco, decide agora finar col apoyu económicu al Oviedo Club Baloncesto (OCB), al Club Balonmano La Calzada –que milita na máxima categoría femenina– y a l'Agrupación Deportiva Baloncesto Avilés (ADBA), otru equipu tamién femenín.

Unicaja, una marca tradicionalmente venceyada al baloncestu, sí va siguir patrocinando al Club Baloncesto Málaga d'ACB, del que ye propietario al traviés de la Fundación y al qu'aporta 5 millones d'euros polos 125.000 euros que recibía esta temporada l'OCB. Al conxuntu uvieín llegó-y la confirmación del fin de la esponsorización esta mesma selmana, na qu'afronta les eliminatories pa xubir a l'ACB.

Cuartu enfrentamientu

A les 20.30 hores d'esta tarde l'equipu de Natxo Lezkano va saltar al Pabellón Municipal de Palencia pa enfrentase al Zunder Palencia nel primer partíu de los cuartos de final de los play-offs. Va ser el cuartu enfrentamientu ente los dos equipos nel asaltu a la máxima categoría del baloncestu, les trés llevaes polos castellanos, la última nel 2008.

Los enfrentamientos na lliga regular d'esta temporada dicen los contrario, con dos trunfos pal OCB, polo que la moral de los uvieínos pa dar la vuelta al factor cancha y eliminar al Palencia ye máxima. Oliver Arteaga ye la única dulda cola que cuenta'l conxuntu asturianu, mentes qu'Alonso Meana ye baxa pa tol crucie.

Na semeya, Jeff Xavier llanza a canasta nun partíu del OCB. Semeya propiedá del Oviedo Club Baloncesto.

 

 

 

Contador Estadistiques