Unes xornaes analicen la catástrofe del Prestige

Un añu dempués de la marea prieto, el cascu ferruñentu del petroleru Prestige sigue dando que falar. Esta tarde entamen a les 4 y media nel Antiguu Institutu de Xixón unes xornaes entitulaes "Prestige a fondo", qu'organiza l'Asociación Española de Marina Civil col sofitu del Ayuntamientu de Xixón y del Gobiernu asturianu. Les xornaes cuerren a cargu de José Antonio Madiedo Acosta, presidente de l'Asociación Española de Marina Civil, y director xeneral de Marina Mercante na segunda llexislatura del PSOE (1986 -1989) quien tamién acusó al gobiernu d'esconder información sobre la xestión de la catástrofe y criticó que na mar anguaño lo primero ye'l negociu y dempués la seguranza. Les xornaes inclúin conferencies como "Les comunicaciones
y el Plan Nacional de Continxencies", "Imáxenes del accidente", "El Prestige: Antecedentes de la catástrofe" o "Les llecciones que del Prestige" y van contar cola presencia de representantes de la Plataforma Nunca Mais

Precisamente coincidiendo con estes xornaes, el pleitu que punxo Izquierda Xunida en Xulgáu de Corcubión pola perda del Prestigesigue dando que falar. L'informe técnicu que-y encargó la coalición d'izquierda a la Universidá Politécnica de Catalunya y que güei presentó en Xixón l'abogáu que lleva'l casu pa IX responsabiliza directamente al Gobiernu de la catástrofe. L'estudiu afirma que "pue sacase que quien dio la orde de llevar el petroleru pa contra la mar sabía que la contaminación diba afectar a tola costa cantábrica".