Una web sobre'l patrimoniu inmaterial va activase nel 2023 y va formar parte del portal dedicáu a la cultura d'Asturies

|
Berta Piñán

Nos primeros meses del 2023 va activase “una web específica del patrimoniu culturar inmaterial asturianu que va poner atención especial al llabor y los fondos de los archivos de tradición oral esistentes”, anunció la conseyera Berta Piñán. Un conteníu que va formar parte d’un gran portal dedicá a la cultura d’Asturies previstu pa esi mesmu añu.

Ésti ye ún de “los oxetivos de la mio conseyería”, contar “con un portal web dedicáu a la cultura y al patrimoniu cultural d’Asturies que de manera integral muestre la riqueza de la nuestra creación artística, la programación de les nuestros equipamientos culturales y la bayura patrimonial qu’atesoramos, too esto dende una perspeutiva integrada, áxil y visualmente mui atractiva”. Asina respondió la responsable de Cultura, Política Llingüística y Turismu en Comisión a la entruga del diputáu Luis Armando Fernández Bartolomé “en qué consiste, cuáles son los sos oxetivos y qué plazos manexa la so conseyería pa desenvolver el portal web dedicáu a la Cultura y al Patrimoniu Cultural Asturianu”.

Piñán apuntó que los esfuercios hasta la fecha centráronse na ellaboración de los conteníos específicos que van integralu, ente los que citó los dedicaos a los xacimientos arqueolóxicos, el Camín de Santiagu asturianu “o los que d’equí a poco van ponese en marcha sobre la cultura castreña asturiana que van dexar consultar un verdaderu atles de los pueblos fortificaos asturianos con accesu a toles investigaciones arqueolóxiques desenvueltes nellos”. Nesti puntu anunció que “tamién se ta trabayando pa poner en marcha nos primeros meses del 2023 una web específica del patrimoniu culturar inmaterial asturianu que va poner atención especial al llabor y los fondos de los archivos de tradición oral esistentes que quieran sumase a esta iniciativa de divulgación”.

Posibilidaes pa la llingua asturiana

Na réplica, l’ex diputáu de Ciudadanos, agora nel grupu mestu, apuntó que “agora tenemos coses, pero son disperses. Falta sistematicidá no que tenemos colgao na web y falta afondamientu”. “La vuelta de tuerca ye que la dixitalización mete un actor nuevu aparte de les alministraciones, el ciudadanu collaborador nel caltenimientu del patrimoniu”, espuso Fernández Bartolomé, que darréu emponderó que Piñán incluyera tamién nel proyeutu “el patrimoniu inmaterial; creo qu’ehí tenemos munches posibilidaes, sobre manera en tolo rellacionao cola llingua asturiana”.

“Apoyaré un aumentu sustancial d’una partida pa esti procesu de dixitalización qu’amás creo que tien la coxuntura favoratible de los fondos europeos”, apuntó pa finar en referencia al so posible sofitu a los Presupuestos del 2023 que se tán negociando estes selmanes. Por último, Piñán rescampló que’l portal va desenvolvese cola collaboración estrecha de les direiciones xenerales de Cultura y Patrimoniu, y de Seguranza y Estratexa Dixital, y que la previsión ye axudicalu enantes de que fine l’añu pa qu’entre en funcionamientu a lo llargo del 2023.

 

Contador Estadistiques