Una web dedicada al ETLEN permite la so descarga llibre y presenta información sobre esti atles llingüísticu

El ‘Estudiu de la Transición Llingüística na Zona Eo-Navia (ETLEN)’, un llabor de 17 años de trabayu dende’l Seminariu de Filoloxía Asturiana de la Universidá d’Uviéu baxo la coordinación de Ramón d’Andrés, ta disponible na rede pa la so descarga de baldre. Habilitóse pa ello una web propia con amplia información sobre esti proyeutu.

Foi n’avientu del 2017 cuando se presentaba esti trabayu del que son autores D’Andrés, Fernando Álvarez-Balbuena García, Xosé Miguel Suárez Fernández y Miguel Rodríguez Monteavaro, equipu que tuvo’l sofitu d’un ampliu grupu de collaboradores. Dende’l 2000 al 2015 desendolcóse’l trabayu de campu, encuestación y análisis de datos, mentes que nos dos años últimos siguientes preparóse la edición del atles, espublizáu por Trabe y la institución universitaria.

Seis años depués esta completa investigación queda a disposición de tola xente interesao al traviés de la rede nuna web específica xubida al servidor de la Universidá d’Uviéu. Ésta, amás d’ufrir la descarga completa o per seiciones, aporta información sobre’l procesu d’ellaboración y una bibliografía de llibros, artículos y comunicaciones en congresos relativos al ETLEN.

“Ye un completu atles llingüísticu del gallego-asturianu –llamáu tamién gallegu d’Asturies o eonaviegu– que contién un total de 643 mapes de la frontera ente los dominios gallegoportugués (gallegu) y asturlleonés (asturianu). Bona parte d’ellos son de tipu dialectográficu (mapes dialectales de fechura clásica), pero hailos tamién de tipu estadísticu (dialectométricos y horiométricos), colos que se midió esta frontera llingüística ente’l gallegoportugués y l’asturlleonés na faza más occidental d’Asturies”, resumen los sos responsables.

Pa visitar la web ha calcar equí.