Una plaga de guxán ataca'l Navia-Eo

Una plaga de guxán ta atacando dende'l
día 27 de setiembre l'occidente asturianu. Los guxanos, que s'alimenten
de los raigones de la pación, tan dañando enforma los praos de
los conceyos de la costa occidental ente'l Navia y l'Eo, comiendo tola pación bueno que val pal ganao.



La Conseyería de Mediu Rural y Pesca del Principáu
identificó güei la especie causante de la plaga, que ye'l
guxán
soldáu (Cirphis unipuncta), un lepidópteru de la familia
Noctuidae. Los individuos adultos de la especie son unes caparines de vida
nocturno, mientres que les larves, qu'anden guardaes pel día, salen a
comer a última hora de la tarde. Según la conseyería,
l'apaición de la plaga correspuende al ciclu biolóxicu de la
especie, que suel criar trés xeneraciones al añu, siendo la mayor
concentración d'individuos a últimos del veranu y primeros de la
seronda, colo que ye más fácil que se dea una situación de
plaga, como ye'l casu. Según espliquen los técnicos de la
Conseyería, los guxanos tan pa entrar a la fase final de
maduración enantes de facese adultos, que sedrá pa la
primavera



Contra la plaga, la Conseyería punxo a disposición de los
afectaos una llinia d'ayudes pa cubrir el dañu en praos, leguminoses,
cereales y cultivos de güerta, mientres que'l Llaboratoriu de
Sanidá Vexetal tien una llista de los principios activos que puen
gastase como insecticida contra los guxanos y de les marques comerciales con
que se distribúin. Ente los más conocíos, valen el
Fenitrotión en concentraciones hasta'l 50%, el Malation, el Clorpirifos
hasta'l 75%, el Piridafention al 40%, Clorpirifos y Azadiractin.