El sábadu arranca la esperada cita en La Esposición que tien a Luar na Lubre y Celtas Cortos como principales actuaciones.
Corvera va acoyer l'apertura del XXV Festival Intercélticu d'Avilés y Comarca a les 12.15 hores. Va ser n'El Llar, pa siguir con un pasucais y a una amuesa de folclor celta cola Banda Gaites de Corvera d'Asturies, el Grupu de Baille Tradicional de Corvera y la gallega Banda de Gaitas Tradicional Airiños de Fene.
L'entamu n'Avilés va ser a les 19.30 hores cola apertura del Mercáu Celta y l'área de restauración y la presencia de los coruñeses. A les 22 hores va tener llugar una Nueche en Danza cola Bandina Tuercipié y Ambás y Ramsés, pa depués dexar escenariu abiertu pa siguir cola folixa.
El domingu l'actividá entama a les 12.30 hores cola ambientación d'Ariños de Fene. El valtu va protagonizar la tarde, con una charra sobre les lluches celtes a les 19.15 hores a cargu de Fernán Morán, presidente de la Lliga Celta d'Asturies, y Enoñ Fuente, coordinador del programa pa recuperar el valtu, y una exhibición d'esti deporte.
Pela nueche va actuar Argayu a les 22.15 hores y va poner el ramu a la xornada una foliada gallega.
Una selmana d'actividaes
A lo llargo de la selmana l'Asociación Cultural Esbardu, organizadora del Intercéltcu, va programar numberoses actividaes nes que va haber presencia de formaciones escoceses y gallegues. Los conciertos nocherniegos van protagonizalos Guieldu (llunes), Deira (martes), Symbio (miércoles) y Lume de Biqueira Celtic Band (xueves), y va entamase una fiesta asturiana (miércoles), una escocesa (xueves), una gallega (vienres 29) y una irlandesa (sábadu 30).
Na fin de selmana van celebrase los dos conciertos principales, entrambos de pagu con un costu de 10 euros caún. El vienres va tocar la histórica banda gallega Luar na Lubre y el sábadu el popular grupu castellanu Celtas Cortos.
Na semeya, Ramsés y Ambás.
Adxuntu | Tamañu |
---|---|
![]() | 122.94 KB |