Una mediana de formigón, radares o limitar la velocidá, midíes p'aumentar la seguranza nel corredor d'El Nalón

El conseyeru Alejandro Calvo va aconceyar el llunes colos alcaldes pa informar de les aiciones depués de los últimos accidentes mortales.

La muerte ayeri d'una muyer y el so fíu vecinos d'Uviéu de 68 y 39 años por un choque frontal nel corredor d'El Nalón, que provocó tamién cuatro firíos, ún d'ellos grave, tornó a prender l'alarma de la seguranza nesta vía. El Gobiernu va plantegar a Demarcación de Tráficu midíes que "en dalgunos casos dependen d'ellos, como la instalación de radares fixos o radares de tramu, reducción de la velocidá", pero tamién elementos "que separten les dos víes, lo qu'obligará a ampliar o desplazar los arcenes y a colocar medianes naquelles zones que lo requieren, amás de la instalación de tou tipu señalización horizontal, vertical, lluminosa, que permita aumentar la seguridá", apuntó'l responsable de Fomentu, Cooperación Llocal y Prevención de Quemes.

La xunta con Tráficu va tener llugar el llunes, cuando Calvo tamién va aconceyar colos alcaldes del valle pa informar de les aicones a desendolcar y coordinar toles actuaciones. El conseyeru apuntó que "tamos trabayando y acelerando los plazos que nos comprometiéramos, fundamentalmente a curtiu plazu, pero tamién a mediu plazu tán faciéndose estudios, pa l'ameyoramientu de la vía", l'AS-117, onde 5 persones finaron nos meses últimos.

Na imaxe, un momentu de la intervención de los servicios d'emerxencia nel accidente d'ayeri. Semeya del 112 Asturies.