Una inmobiliaria australiana va facese cargu d'un centru comercial de Xixón

La inmobiliaria australiana Larry Smith robló un alcuerdu colos propietarios del inmueble pa facese cargu de la comercialización de los locales del centru comercial "los Fresnos" asitiáu nel barriu xixonés d´El Llano. Anguaño, la propietaria d´esta gran superficie ye la empresa Testa Inmuebles en Renta, filial la inmobiliaria madrilana Sacyr Vallehermoso. Nun hai muncho qu'esti centru, inauguráu en 1992, se remocicó dafechu con una inversión penriba los 5 millones d´euros dempués que la inmobiliaria madrileña-y mercase les instalaciones a l'asturiana Mall. El cambéu de propietarios supunxo una meyora n'imaxe y rentabilidá pa un centru que taba perdiendo fuelgu énte la competencia y nel que cada vegada se veien más locales vacios.

Amás del alcuerdu n´Asturies la empresa Larry Smith tamién va comercializar dellos centros propiedá de Sacyr Vallehermoso en Madrid, Baleares, Andalucía y Euskadi. Larry Smith ye una filial del grupu empresarial Lend Lease, d´orixe australianu y asitiada en dellos países. El volume de negociu d´esti grupu d´empreses nel Estáu Español axunta los efectivos de 125 proyectos valoraos penriba los 3.000 millones d´euros. Per otru llau la inmobiliaria Testa ta especializada en propiedá de grandes superficies, con una ufierta de más de 1,3 millones de metros cuadraos p´alquilar.