Una especie nueva de páxaru entra n'Asturies

Col cambéu d'estación y el pasu d'aves migratories, la xente aficionao a la ornitoloxía tien un mes estráu d'apaiciones d'especies de páxaros pela nuestra costa. Anque lo normal ye que tolos años apaezan les mesmes especies, LLanes rexistró esti 27 de setiembre la primer apaición nel conceyu d'una especie que nunca nun se viere n'Asturies hasta va bien poco, la papuda de la cabeza negra. L'animal, un machu, viose en La Talá, la zona de la costa de Llanes amenazada pola construcción d'una urbanización de 500 xalés y que ye ún de los sitios onde más especies de páxaros pasen a lo llargo del añu. Ello ye que cola apaición de la papuda de la cabeza negra, yá son 154 les especies distintes de páxaros que van atopándose dende 1.977 en La Talá.

Según esplica Luis Carrera de la Sociedá Española d'Ornitoloxía, la papuda de la cabeza negra (Sylvia melanocephala) ye un páxaru insectívoru que vien de la parte del mediterráneu, y qu'anguaño ta espardiéndose per tola península. Supónse qu'esta espansión vien dada en parte pol calentamientu del clima, que ta trayendo a esta nueva especie pel oriente y l'occidente asturianos, allegándose pasin ente pasu al centru de la costa asturiana, como confirma el que xunta esti primer contactu en Llanes, se tengan vistos exemplares en Ribeseya, Tapia y Castropol, onde hai delles pareyes criando. la semeya qu'acompaña esta información nun correspuende col exemplar llaniscu, pero da una idega del aspectu d'esti páxaru, y ye orixinal de Petri Pietilainen