Selmana de les Lletres Asturianes

Una 'Ensin Folixa na Primavera' y con zarru perimetral en Mieres

|
Cartelu Ensin Folixa na Primavera

La fiesta adáptase a la situación y conviértese nun programa d'eventos culturales.

Dende güei y hasta'l domingu'l Conceyu de Mieres entama 'Ensin Folixa na Primavera', la variante de la 'Folixa na Primavera' pa esti tiempu de pandemia. Nella nun va faltar la música y la gastronomía, protagonistes tolos años nuna cita qu'esti añu ta acutada a los vecinos del conceyu al tar ésti zarráu perimetralmente al entrar en riesgu estremu pola so situación epidemiolóxica.

Esta tarde ye la inauguración, dende les 18 hores, en Mieres Centru Cultural, momentu que se va aprovechar pa conmemorar los 185 años de la creación del Conceyu de Mieres col llibru 'Anécdotas históricas de un Ayuntamiento'. A les 20 hores Baiuca va actuar nel Auditoriu Teodoro Cuesta, onde mañana al meudía va presentase otra obra, nesti casu 'Una vida natural al lado de un árbol: el manzano', de Pepe Riestra.

La tarde va ser pa la reciella con 'La Folkixina de la Folixina', con música folk pa neñes y neños y los sos familiares, que se va desendolcar nel patiu del Aniceto Sela dende les 17 hores. Darréu, a les 20 hores, L-R va tocar nel Teodoro Cuesta, conciertu que nel que van collaborar Sylvain Barou, Dolfu R. Fernández, Mapi Quintana y Silvia Quesada.

Los títeres van animar la mañana del domingu nel Aniceto Sela, onde se va representar 'La niña que riega la albahaca', de Bailader, a les 11 y a les 12.30 hores. Mentes, el menú de la Folixa va preparase nuna amuesa de cocina a les 13 hores nel Teodoro Cuesta a cargu d'Eugenio Cuesta 'Genio'.

Les dos últimes actividaes van ser, a les 18 hores: 'Al son del camín' nel Aniceto Sela, coles actuaciones de Ruxidera, Prau Llerón, L'Artusu, Trebeyu, Algaire y Fruela 757; y la representación de 'Cuentos del jabón. Historias y burbujas', de Pompas y Pompones, nel Teodoro Cuesta. Pa participar néstes y en cualquier de les actividaes programaes na 'Ensin Folixa na Primavera' ye necesario acutar plaza, cola posibilidá de siguir munches d'elles en direuto pela canal de YouTube del Conceyu.

Tamién se pue visitar estos díes, y hasta'l 30, la esposición '25 años de Folixa en Mieres' na Biblioteca. Otra manera, mañana y el domingu va tener llugar una 'Folixa Vermú' nes terraces de los chigres de Mieres y Turón de 12 a 16 hores.

Calca equí pa consultar el programa de 'Ensin Folixa na Primavera'.

AdxuntuTamañu
Image icon Cartelu Ensin Folixa na Primavera101.6 KB
Contador Estadistiques