Una encuesta da-y 4 puntos de ventaya al PP

Según va allegándose la cita electoral del 14 de marzu van apaeciendo les primeres encuestes electorales. Según una qu'espublizó ayeri'l periódicu catalán La Vanguardia, el Partíu Popular ganaría el 14-m con una ventaya de 4 puntos sobre'l PSOE, pero quedaría lloñe de la mayoría absoluta.

Con una intención de votu del 42,6 por cientu pal PP y el 38,6 pal PSOE, la encuesta fecha pol Institutu Noxa ente'l 6 y el 12 de febreru dexaría un parlamentu con 164 -169 escaños pal PP contra los 183 que tien agora y pondría al PSOE con138 - 142 contra los 125 que sacó nel 99. Con too y con ello, la gran novedá nel estudiu qu'espublizaba ayeri'l diariu catalán ta na xuba espectacular d'Esquerra Republicana, que podría duplicar el resultáu del 2.000 y ponese en siete diputaos, algamando representación peles cuatro provincies catalanes, mientres que Convergencia i Unió recularía hasta los nueve escaños en cuenta de los quince que tien agora. La encuesta catalana, primer termómetru na carrera electoral da tamién una intención de votu mui alta, con más del 90% de los encuestaos avisando de que van dir a votar.