Una docena de profesores universitarios de Filoloxía demanda “rigor intelectual” nel alderique públicu sobre l’asturianu

|
Facultá de Filosofía y Lletres de la Universidá d'Uviéu

Cinco miembros del Seminariu de Filoloxía Asturiana de la Universidá d’Uviéu y otros siete del departamentu de Filología Española asoleyaron esti vienres una declaración pública entitulada ‘Discrepancia ideológica y rigor intelectual en el debate público sobre la lengua en Asturias’. Na mesma esponen once “consideraciones de mínimos” respeuto “a les coordenaes intelectuales” del alderique actual sobre l'idioma.

“Científicamente nun ye posible negar l’asturianu nin el gallego asturiano nin obviar les claves de la so esistencia histórica y presente. Sería bono pa un debate d’indudable interés públicu como’l relativu a les llingües d’Asturies procurar una mínima esixencia de rigor a los sos actores, lo que nun va en menoscabu, mui al contrario, de la llexitimidá de los distintos puntos de vista”, fina dicha declaración, que naz de la responsabilidá social “como universitarios” d’esti grupu de profesores y investigadores nes árees de llingüística hispánica y románica, con esperiencia acreditada nel campu de la Filoloxía Asturiana “pa esponer a la sociedá asturiana dalgunes consideraciones de mínimos con respeuto a les coordenaes intelectuales del actual debate sobre la llingua”.

Enantes el testu apuntara que “nuna comunidá que se quier plural y discrepante, la concordia cimiéntase na ellaboración coleutiva d’un discursu inclusivu articuláu dende’l conocimientu científicu y la crítica racional y non pola ocurrencia oportunista, l’arrebatu visceral o l’interés a curtiu plazu col que se nutre l’estremismu y la intolerancia”, llamando l’atención a los medios de comunicación, “los llamaos a favorecer esi debate y a garantizar la so calidá intelectual con un tratamientu ecuánime y equilibráu de les distintes posiciones y una esixencia mínima de rigor nel tratamientu de los aspeutos controvertíos”. En definitiva, un requerimientu básicu como “encuadrar de forma correuta l’argumentación ensin dar dar difusión a falsedaes y bilordios, pero tampoco a tópicos gastaos o esparates ampliamente desacreditaos nel estáu actual del conocimientu científicu”.

Nos once puntos incluyíos na declaración tóquense y esplíquense dellos aspeutos que se tán tratando nel alderique actual sobre l’idioma, un debate que tuvo un últimu esperpénticu episodiu nesti Plenu últimu na Xunta Xeneral, protagonizáu pol popular Pablo González. Asina, atopamos que “ye incuestionable que n’Asturies coesisten trés llingües, con distina distribución xeográfica, social o d’usu situacional”; que “el glotónimo ‘asturianu’ ye’l de más llarga tradición histórica, más ampliu usu llocal, más popular y ideolóxicamente neutru como nome”; o que l’adopción d’una serie de convenciones normatives “ye práutica común en cualquier llingua, como consta a cualquier persona alfabetizada, y nun supón la creación de nenguna llingua artificial llamada a sustituyir o a limitar los usos orales espontáneos, que tienen el so propiu ámbitu d’espresión”.

Los profesores firmantes de la declaración ‘Discrepancia ideológica y rigor intelectual en el debate público sobre la lengua en Asturias’ son Xulio Viejo, Ramón d’Andrés, Xuan Carlos Busto, Fernándo Álvarez-Balbuena y Miguel Rodríguez Monteavaro, del Seminariu de Filoloxía Asturiana, amás d’Alfredo Álvarez Menéndez, Juan Carlos Villaverde, Taresa Fernández Lorences, Álvaro Arias, Raquel Suárez Fernández, Pablo Roza y Ramiro Javier Barcia.

Contador Estadistiques