Una docena d'actrices y actores va participar na grabación de 'L'Antroiro'

Trátase d'una obra de radioteatru, a partid d'una historia de Sergio Buelga, pa conmemorar el Día Mundial del Teatru, que se celebra'l día 27.

La Federación d’Asociaciones de Teatru del Principáu d’Asturies (FETEAS), en collaboración con Cuatro Gotes, ta desendolcando'l proyeutu 'L'Antroiro' como contribución a la propuesta d’Escenamateur de celebrar, de forma telemática, esta xornada. Dende la selmana pasada una docena d’actrices y actores de distintos grupos teatrales de toa Asturies ta trabayando nel testu, que se va grabar mañana, dende les 10 hores, nel estudiu que la productora xixonesa tien en L'Arena.

El guión propuestu ye l’adaptación del cuentu policiacu homónimu de Buelga ambientáu nel conceyu d’Allande que surdió como respuesta a la iniciativa de creación narrativa n’asturianu d'Ediciones Radagast '78 crímenes, 78 conceyos'. Esta pieza de radioteatru va completase con un documental del procesu de creación, grabación y edición que va incorporar les impresiones de los participantes.