UNA-Bloque de Carreño presenta alegaciones a la subestación y a la llinia llétrica de 12 quilómetros previstes nel conceyu

La coalición UNA-Bloque por Asturies de Carreño mostró esti martes la so oposición a la construcción d’una subestación en La Reboria y a una llinia llétrica de 12 quilómetros nel conceyu. La formación presentó alegaciones al proyeutu y solicitó a Red Eléctrica Española (REE) que lu paralizase.
 
Unidá Nacionalista Asturiana (UNA)-Bloque por Asturies apunta que la llinia lléctrica de 12 quilómetros va pasar peles parroquies de Prevera, Albandi, Priendes, Quimarán, El Valle y Llorgozana hasta llegar a Cardo, yá nel conceyu de Gozón. “La subestación nueva y llinia llétrica tienen como oxetivu evacuar la producción llétrica xenerada poles centrales de ciclu combináu que s’instalen nel puertu d’El Musel, y apaez contemplao na propuesta de Planificación de los Seutores d’Lletricidá y Gas 2008-2016. Esti proyeutu provocará un nuevu impautu al paisaxe de Carreño, dañará numberoses tierres agrícoles y perxudicará de forma grave les condiciones de vida de munchos vecinos y vecines, afectaos yá en gran midida pola contaminación y les instalaciones industriales”.
 
El conceyal d’UNA cuando REE presentó’l primer proyeutu nel 2009 yá lu refugó de primeres “ante la pasividá de PSOE-IX de Carreño”. Agora, señalan dende la coalición nacionalista, “¿Tan d’acuerdo el resto de grupos políticos cola subestación si ésta s’instala en Carrió? ¿Siguen apoyando la llínia llétrica si va pel trazáu propuestu enantes? ¿O ye que tan a la escontra agora qu’hubo refugu y movilización vecinal, tamos en periodu eleutoral y tienen mieu a perder votos?”.
 
“Dende UNA-Bloque por Asturies de Carreño refugamos dafechu los planes del Gobiernu d’Asturies (PSOE-IX) col apoyu del PP, de convertir esti país nel xenerador llétricu del Estáu cuando ye una actividá que non xenera riqueza nin puestos de trabayu y sí nos dexa degradación del paisaxe, destrucción del texíu económicu tradicional, y niveles grandes de contaminación y enfermedaes avenceyaes a esa contaminación”, finalizaron.