Un remocique polémicu

Dos de les playes con más tirón turísticu del centru-occidente asturianu como son les de San Xuan de L'Arena y Salinas anden faltes de metros de sable, una situación que les autoridaes de la Demarcación de Costes quieren iguar con un ambiciosu plan que yá ta echando a andar estos díes cola instalación de les cañeríes que van aportar sable nuevo a les playes. El proyectu consiste en rellenar dambos sablones con un total d 545.000 mts3 d'arena que va sacase d'un bancu submarín na redolada del Cabu Vidíu, en Cuideiru.

El plan de Costes ye bien agresivu pa col fondu marinu, del que les bombes van tar surniando arena y tolo qu'atropen 24 hores al día a lo llargo de más d'una selmana d'obra, pero entovía hai más, y ye que la poza d'onde se cuenta con sacar el sable ye el llugar d'onde sal cerca de la mitada del calamar que se pesca na zona. Los pescadores de Cuideiru, que ven peligrar la campaña del calamar d'esti añu y dulden sobre los efectos que pueda tener la obra nel caladeru a llargu plazu, opónense a los planes de Costes, que tampoco nun ve bien l'Ayuntamientu de Cuideiru, que pidió la otra selmana una entrevista col director xeneral de Costes. El presupuestu d'esta actuación pa rexenerar les playes ye de 11 millones d'euros, de los que'l 85 por ciento vienen de los fondos de cohesión de la UE y el 15% del Ministeriu de Medio Ambiente, titular de la Demarcación de Costes.