Un profesor fai recuentu de los páxaros muertos pol Prestige

Un esperimentu d'un profesor de la Universidá d'Uviéu evalua en cerca de 300.000 los páxaros muertos pol galipote del Prestige.

Como ye evidente, de tolos páxaros víctimes del galipote, namás una parte mui pequeña lleguen a atropase y cuenten nes estadístiques oficiales, pero la mortalidá real ye, por necesidá, muncho mayor. Pa calcular esta mortalidá, David González, profesor de la Facultá de Bioloxía de la Universidá d'Uviéu fizo un esperimentu que consistió en soltar a la mar 150 tacos de madera etiquetaos y preparaos pa tener una densidá asemeyada a la d'un páxaru muertu, concretamente d'un álcidu. Al acabar l'esperimentu, d'esos 150 tacos apaecieron un total de 17, que s'atoparon nos puntos xeográficos más estremaos. Los más d'ellos apaecieron dende l'oriente d'Asturies a Cantabria, pero otros acabaron en puntos tan separtaos como Ferrol o Bretaña, lo que da pa facese una idega del efectu de les corrientes sobre los páxaros muertos y sobre les manches de galipote. Tamién el factor tiempu cuenta, y ye que anque los primeros tacos apaecieron a los 40 díes de soltalos, otros tardaron cerca de 5 meses.

Teniendo en cuenta toles correcciones necesaries a partir d'esta preba, y echando cuentes coles cifres oficiales de páxaros recoyíos hasta abril del 2.003 (2.749 ente toles especies) el profesor González calculó que namás se pañaron sobre'l 6,37% de los páxaros muertos, lo que supón que la mortalidá real de páxaros, sólo n'Asturies, foi de 43121 exemplares, colo que la total, dende Galicia hasta Francia, bien podía llegar a 300.000.