¿Un prestige nel Puertu d'El Musel?

L'otru día, cuando facíen dos meses del accidente del Prestige, Asturies recibió la visita d'un barcu que concueyaba abondo cola descripción del petroleru responsable de la marea negra. Ello ye que en Puertu d'El Musel de Xixón entró a descargar fuel-oil el buque "Nikolas". Bien ye cierto que namás carretaba 3.550 tonelaes de carga en cuenta de les setenta y pico mil del Prestige, pero en tolo demás les semeyances nun tienen torna posible: cascu cenciellu, trenta años en serviciu y una bandera panameña de conveniencia, que, pa más aquello, yá va cambiando delles vegaes de país nes tres décades que lleva recorriendo la mar. Pa rematar les coincidencies, el Nikolas, que ta al cargu d'una casa griega, lleva dende 1995 dando problemes nes revisiones. Más información nel web d'Ecoloxistes Asturies, que se molestaron n'investigar la historia d'esti barcu.