Un petroleru de 23 años pal Musel

Tres meses depués de la catástrofe del Prestige, que punxo d'actualidá tola problemática del tresporte per mar, nun dexen d'apaecer perdayuri petroleros monocascu y con bandera de conveniencia que xeneren la inevitable alarma ente una población yá mui sensibilizao. Ello ye que la Compañía Loxística d'Hidrocarburos va emplegar pa carretar fuel per tola costa cantábrica al "Alcudia" un petroleru monocascu de ventitres años con capacidá pa cargar 20.370 m3 de petroleo y los sos derivaos y que d'agora en p'alantre va facer la ruta ente los puertos d'A Coruña, Xixón-El Musel y Bilbao. L'Alcudia operaba hasta va bien poco ente la península y les baleares, pero'l 28 d'avientu de 2.002, col Prestige echándolo too y más pa con ello, L'Alcudia entafarró de galipote la playa d'Alcaidesa, xunta La Línea de La Concepción (Cádiz). Según parez, el barcu nun pasaba una revisión dende xineru del 2000, anque estes son obligatories cada cinco meses. Esti episodiu y el de la gabarra que fundió con 1.000 tonelaes de galipote, pudieron ser causa pa que se treslladare'l barcu a otra ruta onde nun lu acompañare la imaxe de nave peligrosa. Más información nesti artículu de El Mundo sobre'l llabor del barcu en Baleares.