Un gol de Nacho Calvillo nel tiempu añadíu da aire al UP Langreo

Los azulgrana perdieron 2-1 na so visita a Orihuela y van xugase l'ascensu'l domingu en Ganzábal. Fernando Alonso gana la llexendaria 24 Heures du Mans con Toyota.

L'UP Langreo regresó con vida de Los Arcos gracies a un tantu de Nacho Calvillo nel minutu 93 de partíu tres rematar un llanzamientu de falta llateral. Un gol que permite suañar a l'afición llangreana col saltu a la Segunda División B.

Los llocales pronto quixeron dexar marca del so potencial, y a los 27 minutos yá ganaben por 2-0 gracies a los tantos d'Ayo y Antonio. Los dos golpes fixeron reaicionar a los llangreanos, que sufrieron l'alta temperatura cola que se disputó l'alcuentru, y la recompensa llegó nel tramu final col gol de Nacho Calvillo que dexa abierta la eliminatoria.

El choque de vuelta va xugase'l domingu a les 18 hores en Ganzábal, partíu nel que los socios del Unión han de pagar 5 euros, siendo de baldre pa los menores de 17 años. La entrada anticipada –hasta'l vienres– ye de 12 euros, pa depués xubir a 15 euros, mentes que pa los menores de 25 ye de 10; pa los de 17, de 5; y la infantil, de 2.

Más cerca de la triple corona

Fernando Alonso sigue agrandando la so lleenda tres ganar na histórica carrera 24 Heures du Mans. Fíxolo col equipu Toyota, que consiguió'l so primer trunfu nes sos venti participaciones na prueba.

El pilotu ovetense compartió'l TS050 Hybrid col xaponés Kazuki Nakajima y col suizu Sébastien Buemi. Tres esta victoria, Alonso plantégase dir pela triple corona, dalgo que namái consiguió l'inglés Graham Hill: ganar el Grand Prix de Monaco, les 24 Heures du Mans y la Indy 500.