Un festival virtual va ufrir más d’una decena d’actividaes pa poner en valir la cultura asturiana

Esti miércoles va principiar el #FormientuEnCasaFest, un certame virtual p’animar el pasu del asillamientu de la sociedá asturiana y poner en valir la cultura asturiana. Hasta’l 30 de marzu la revista de lliteratura moza entama actividaes diaries, siendo la primera un recital-presentación de 'Cállanos con esa música' de Diego Solís.

“La idea d’esti festival virtual ye ufrir a la xente actividaes lliteraries y culturales que valgan pa face-yos pasar el tiempu d’esti enzarru nes cases y poner en valir la importancia de la cultura asturiana y la llingua asturiana nun momentu como ésti”, apunten dende Formientu. Les actividaes van facese al traviés de cámara web y en direuto dende les cases de los protagonistes de cada actividá, emitiéndose al traviés del Facebook de la revista.

El recital-presentación de los poemes del llibru ‘Cállanos con esa música’, protagonizáu por Solís, codireutor de la revista, va inaugurar el certame a les 19 hores, horariu previstu pa toles actividaes. Mentes, mañana va ser el turnu d’Alba Carballo, que va poner la charra ‘Averándonos a ‘Montesín’ y a María Xosefa Canellada’, pa siguir el vienres con un conciertu de Silvia Quesada.

Inaciu Galán –coordinador d'esta iniciativa xunto con Solís–, Alfredo González, Sergio Buelga, Raquel F. Menéndez, Xaime Martínez, Víctor Suárez, María Llatores, Maggy, Blanca Fernández, Antón Martínez y el lleonés Fran Alegre son les otres persones destacaes de la nuesa cultura que van participar nel #FormientuEnCasaFest hasta’l día 30. Si finalmente s’allargara, como paez, l’estáu d’alarma por cuenta de la COVID-19, el certame protagonizáu por xente mozo ampliaríase con actividaes nueves les xornaes siguientes.

Ésti ye'l programa del #FormientuEnCasaFest:

• Miércoles 18: Diego Solís, recital-presentación de poemes del llibru 'Cállanos con esa música'.
• Xueves 19: Alba Carballo, charra 'Averándonos a 'Montesín' y a María Xosefa Canellada'
• Vienres 20: Silvia Quesada, conciertín en solitariu.
• Sábadu 21: Inaciu Galán, presentación-llectura del llibru 'Cartes nel horru (y delles hestories más)'.
• Domingu 22: Alfredo González, alcuentru músicu-lliterariu.
• Llunes 23: Sergio Buelga, charra 'Telva y Pinón nel teatru'.
• Martes 24: Raquel F. Menéndez, charra 'Delles (re) llectures'.
• Miércoles 25: Xaime Martínez, música y poesía.
• Xueves 26: Víctor Suárez, charra '#QuedaEnCasa, edita en Wikipedia'.
• Vienres 27: María Llatores, conciertín.
• Sábadu 28 a les 12 hores: Maggy, cuentacuentos pa la reciella.
• Sábadu 28 a les 19 hores: Blanca Fernández, charra sobre'l cosplay.
• Domingu 29: Antón Martínez, conciertu d emúsica pa la mocedá.
• Llunes 30: Fran Alegre, recital-conciertu de poesía y música dende Lleón.