Un documental xorrasca na historia del "Xixón Sound"

Nel veranu de 1993, una camiseta prieta cola frase "Cortate el pelo, cambia de vida" convertíose nuna de les prendes más populares de la temporada. Xunta la estraña frase, sacada d'un cantar del grupu de pop Pavement, la camiseta llevaba pintaos los nomes de los grupos de música de Xixón que más sonaben daquella: Nosträsh, Penélope Trip, Cactus Jack, Eliminator Jr, Medication, una llista mui llarga con referencies a estilos musicales bien distintos, dende'l mayoritariu noise de Penélope Trip hasta'l rockabilly de grupos como Los Cohetes pasando pel pop d'Australian Blonde. Too aquello yera'l Xixón Sound, una etiqueta que sonsañaba la del "Soníu Seattle" y cola que se clasificó un momentu, más qu'un movimientu musical, qu'aguanto dellos años y del qu'entovía queden supervivientes como Manta Ray, anque bien d'ellos trabayen con estilos deseparaos de lo que facíen naquel tiempu, casu de Pedro Vigil, qu'aparcó'l noise pa dedicase a interesantes iniciatives de música orquestal y proyectos como "Edwin Moses"

La creación del Xixón Sound ye precisamente l'asuntu d'un documental que tan preparando Elena Medina y José Fernández cola productora madrileña "Esgaya Films". Hores d'entrevistes y declaraciones de los protagonistes del movimientu centren "Cambia de Vida: el viaxe del Xixón sound' títulu d'esti documental del que se fizo una pequeña preestrena esti domingu nel Festival de Cine. Los realizadores del documental espliquen que, anque namás pasaron diez años dende que dio aniciu aquel movimientu, los cambeos foron grandes, y asina lo sorrayaron los pocos músicos qu'apaecieron pela presentación del proyectu nel marcu del Festival de Cine de Xixón. Anque dellos grupos de la escena del Xixón Sound llegaron a lo cimero de la escena del pop y rock alternativos, bien d'ellos quedaron pel camín. Pedro Vigil, que yera'l guitarrista de Penélope Trip, ún de los grupos qu'entamaron la escena "Xixón Sound" sorrayó que parte del relativu fracasu del movimientu tuvo que ver con que'l "Xixón Sound" nunca nun trescendió de Radio3 y de delles revistes especializaes como Rock de Lux, mientres que grupos d'otros llugares contaron col sofitu mediáticu de canales estatales de TV.

El so testimoniu y el d'otros como Covadonga de Silva, batería de Penélope Trip, Josele Rubio, cantante de Manta Ray, Nacho Vegas, propietariu del Bar La Plaza, onde paraben tolos protagonistes del Xixón Sound, o l'inevitable Luis Mayo, padre espiritual del movimientu. La estrena de la película ta prevista pa primeros del 2005