Un discu fai alcordanza de Manolo del Campo

El Conseyu de Comunidaes Asturianes presentó ayeri na Escuela Municipal de Música de Llanes un llibru- discu col que la entidá quier facer alcordanza del desapaecíu Manolo del Campo.

Flavio de Benito, que fuere gaiteru de Llan de Cubel y qu'actualmente ye'l director de la Banda de Gaites La Raitana, ye l'autor d'estes dos publicaciones, que s'asoleyen cola figura del emigrante llaniscu n'Arxentina Manolo del Campo como referente.

Ello ye que Flavio foi un de los músicos que más ayudaron a Del Campo a recuperar la tradición musical asturiana n'Arxentina, poniendo clas de gaita nel Centru Asturianu de la capital del Ríu de la Plata dende 1992. El gaiteru comentó a Asturies.com que, dempués de la triste perda de Manolo, que morrió'l pasáu mes de mayu, decidióse a trescribir el repertoriu de gaita del Grupu Folklóricu "Pelayo" de Bonos Aires, iguáu por unes 23 pieces y grabar 15 d'elles nun CD que salió gracies al sofitu del Conseyu de Comunidaes Asturianes y nel que tamién participa Pedro Pangua poniendo les percusiones

Manolo del Campo, natural de Pría (Llanes), coló pa l'Arxentina en 1949, convertiéndose bien llueu nun de los más activos representantes d'Asturies na capital del Plata. Defensor de los derechos de la comunidá asturiana nel esterior, Del Campo algamó distingos como la Orde del Méritu Civil y la medalla de Plata del Principáu, rescamplando na so trayectoria de trabayu la creación del Grupu folklóricu Pelayo, la entidá cultural y musical más importante d'América del Sur y guañu tamién d'iniciatives musicales que caltienen vivu'l contactu ente l'Asturies peninsular y la esterior, casu del grupu folk Fardaxu. Xunta esto, Manolo del Campo foi ún de los qu'echaron p'alantre la creación de la Escuela d'Asturianía, iniciativa entamada col Conseyu de Comunidaes Asturianes que-yos permite que los emigrantes asturianos de segunda y tercer xeneración allegase a la cultura del país.

Al actu de presentación del llibru-cd asistieron el secretariu del centru Asturianu de Bonos Aires, Celestino García; el presidente del Conseyu de Comunidaes Asturianes, Manuel de la Cera; el delegáu del Gobiernu n'Asturies, Antonio Trevín, y l'alcaldesa de Llanes, Dolores Álvarez