Ún de cada trés asturianos fuma

Na viéspora del día mundial ensin tabacu, que va celebrase'l 31 de mayu, la Conseyería de Salú asoleyó esta mañana dellos datos sobre'l tabaquismu n'Asturies que los mesmos responsables de salú calificaron de preocupantes.

Los últimos datos que tien la Conseyería de salú nun dan pa ser optimistes.

El consumu de tabacu n'Asturies crez ensin tasa, hasta'l puntu qu'un de cada trés asturianos de más de 15 años tien el vezu de fumar. El viciu de la fumadera ta enraigonando sobremanera ente les muyeres más moces, y ye que'l 45% de les asturianes d'ente 15 y 44 años fumen

Con ello, un total de 300.00asturianos son fumadores, y d'ellos más de 160.000 fumen más d'un paquete (venti pitos) al día. La Conseyería dio a saber que'l tabacu causó directamente n'Asturies cerca de 2.300 muertes nel añu 2.003, una llista negra que sigue más o menos asitiada nes cifres de los últimos años y de la que'l 70% de los que la igüen son homes.

La Conseyería aprovechó la ocasión pa presentar les sos iniciatives nesti terrén, ente les que tan la iniciativa "Vida ensin tabacu" qu'afala a la creación de llugares onde'l tabacu tea desaniciáu. 19 centros de salú, l'hospital del oriente y 126 farmacies yá s'amestaron a esta campaña. D'otra manera, la Conseyería tamién va centrar esfuerzos en trabayar coles muyeres embarazaes pa que dexen el tabacu.