Un congresu va tratar les llingües de la europa ampliada

Rezekne, una villa a cuatro kilómetros de la capital letona, Riga, va ser ente'l 20 y el 23 de mayu del 2004 l'escenariu au se celebre la conferencia internacional sobre "llingües rexonales na nueva Europa", una cita organizada pola Universidá de Rezekne y el departamentu de llingüística de la Universidá A. Mickiewicz de Poznan (Polonia) y que va tratar la presencia nel marcu de la UE de nueves llingües minorizaes qu'hasta agora quedaben fuera del ámbitu de protección que supón la carta europea sobre llingúes rexonales.

La llista de nueves llingües rexonales de la UE enxerta realidaes de les qu'hasta agora nun se tenía munchu conocimientu per esta parte del mundu. Asina atopamos nes repúbliques báltiques trés d'estes llingües. Entamando pel norte, el Voru que se fala n'Estonia y que ye una llingua d'aniciu finés pero estremada del Estón. En Letonia apaez el al Latgalu (conocíu como Letón Oriental o Altu-Letón) que se fala na provincia oriental lituana de Latgale y en Lituania al Semigaitianu o baxu Lituanu que se fala nel centru-occidente de Lituania y que convive col lituanu estandar.

Baxando pa la parte de Polonia atopamos al Kaxubu, quiciás l'idioma con más importancia pol volume de falantes que tienque tien ente 100.000 y 300.00 persones na Pomerania del este, al norte de Polonia. Como datu curiosu, esti ye l'idioma que falaben n'antigua pomerania los personaxes de "El Tambor de fueyalata" la famosa del Premiu Nobel de Lliteratura Günter Grass.

Otros idiomes de la llista son el Polesianu, una varidá de polacu que se fala en Bielorusia y parte de Lituania, el Rutenu, variante del rusu que se fala nuna pica que ta ente Ucrania y Eslovaquia y el Prekmuriu, un dialectu d'una rexón d'Eslovenia.

Amás de tratar esta realidá nueva, el Congresu faise en celebración de los 250 años de la primer obra escrita que s'emprentó en Latgalu, la "Evangelia Toto Anno" de 1753 y los 100 años del decretu qu'acabó en 1904 cola prohibición d'escribir llibros en latgalu. La organización ta pasando esta selmana una primer circular pa dar a conocer el congresu y les condiciones pa participar nelli.