Un congresu d’ornitoloxía y dellos conciertos van servir d’homenaxe a Elías García na seronda del 2021

|
Elías García

Hai un añu de la muerte d’Elías García, pero la so memoria nun queda nel escaezu. Un piñu de collacios y familiares preparen dellos actos d’homenaxe al músicu en Villaviciosa, aplazaos a la seronda del 2021 pola pandemia, que van consistir nun congresu d’ornitoloxía centráu n’avifauna del país, una serie de conciertos de bandes nes que participó y una Nueche en Danza, ente otros.

Anque nun principio la idea yera desendolcar estes actividaes esti mes, coincidiendo col cabudañu de García, la situación sanitaria actual obligó a los sos impulsores a treslladales a la seronda del añu qu’entra, con feches concretes entovía por confirmar. Sicasí, quixeron aprovechar la ocasión pa dar anuncia de les munches iniciatives en mente n’alcordanza del fundador de Llan de Cubel.

La histórica banda va participar nel homenaxe xunto con otres formaciones y artistes coles que trabayó García. Asina, Felpeyu; Ambás y Pepín de Muñalén, colos que conformó Tuenda; L-R; y Mapi Quintana tamién van tar presentes.

De forma paralela, va celebrarase una edición especial de Nueche en Danza, actu popular onde la xente bailla, toca y canta música del país. Too va xuntase nuna mesma fin de selmana, onde va haber esposiciones de fotografía, pintura y instrumentos musicales, una aición de reforestación popular con especies autóctones nun monte ocupáu agora por una plantación d’ocalitos que llevantarán un monumentu vivu a la so obra y a la so memoria, y un congresu dedicáu a la otra gran afición de García, la ornitoloxía.

Ésti va tar centráu na avifauna d’Asturies, en particular, y de la Iberia eurosiberiana, en xeneral, va contar con una salida de campu pela ría, y nél va valorase la importancia de la obra del homenaxáu pal desenvolvimientu de la disciplina. Nos actos participarán especialistes na materia procedentes d’Asturies, Portugal, Galicia, Cantabria, Euskadi y les zones limítrofes de Lleón, Palencia, Burgos y Navarra, amás de figures relevantes de la ornitoloxía a nivel internacional como Daniel García, Paola Laiolo, Magnus Robb, Eduardo de Juana o Daniel López Velasco, que yá confirmaron la so presencia.

Toos estos actos van facese en Villaviciosa pola especial importancia del conceyu pa la ornitoloxía asturiana y pal llabor profesional de García. El Conceyu va collaborar con esta iniciativa d’amigos y familiares pa recordar al músicu y biólogu.

Contador Estadistiques