Un cómic que recupera la figura d’Ana María la Llobera merez el XIV Premiu Alfonso Iglesias

|
Guillermo Menéndez Quirós

Guillermo Menéndez Quirós llevó’l XIV Premiu Alfonso Iglesias de cómic con ‘Ana María. La Llobera d’Asturies’. Con testos na variante oriental del idioma, esta historia recupera la figura d’esta muyer llanisca “silenciada na historia oficial” que vivió un procesu inquisorial pola so supuesta capacidá de controlar manaes de llobos.

El xuráu, presidíu pol direutor xeneral de Política Llingüística, Antón García, y cola filóloga de la direición xeneral Laura Marcos como secretaria, tuvo compuestu poles ilustradores Carmen Peña Calvo y Mónica García Jiménez; la filóloga Claudia Elena Menéndez; la llibrera especializada en cómic María Fente; y el dibuxante y ganador de la edición pasada con ‘Paez que nun foi ayeri’ Ángel de la Calle. Llueu de la xunta celebrada ayeri, rescampló’l valor de les propuestes presentaes y la participación, con 6 proyeutos, “equiparable a otros certámenes del Estáu”.

Sobre la obra ganadora del primeru de los Premios Lliterarios en fallase, que conlleva un premiu de 6.000 euros y la inclusión nel circuitu Autores nel Camín, valora “la recuperación d’una figura de muyer de la historia d’Asturies, silenciada pola historia oficial, la calidá gráfica tan notable y l’usu intelixente del color del proyectu, fechu con una técnica narrativa contemporánea”, asina como “l’apueste pola riqueza llingüística d’Asturies, al reflexar les variantes orientales de la llingua”. Menéndez Quirós ye de La Felguera, pero Ana María yera natural de Bricia.

Nacíu nel 1994 y formáu na Escuela d’Arte d’Uviéu, na Facultad de Bellas Artes de la Universidad de Salamanca y na de la Euskal Herriko Unibertsitatea, el dibuxante tien una trayeutoria amplia como autor de cómic y de novela gráfica. Anguaño ta trabayando en ‘Cumbres en pie de guerra. La batalla del Mazucu’ sobre l’episodiu más representativu de la resistencia republicana cuando la cayida del Frente Norte.

Contador Estadistiques