Un coche pa metese per caleyes

La Xunta Xeneral del Principáu ta acabante d'estrenar cuatro coches nuevos, modelu Volkswagen Phaeton, ún pa usu de la presidenta de la cámara y los otros trés pa ponelos al serviciu de los grupos parlamentarios (PSOE, PP y IX). Con un preciu de 72.000 euros (11 millones y mediu de les antigües pesetes), el Phaeton ye ún de los coches de más categoría dientro de tola historia de los parques móviles oficiales n'Asturies, y entra en competencia col mesmu Audi A8 qu'acarreta personalmente al Presidente asturianu. Motor d'ocho cilindros en V, 240 caballos…. Les prestaciones técniques d'esta maravía de la técnica siguen per dientro, au atopamos distingos como los asientos con banqueta axustable en 16 posiciones, 4 apoyos lumbares, calefacción enxerta nel asientu y posibilidá de masaxe. Si les característiques del coche nun son yá ablucantes abondo, la casa Volkswagen convídanos a visitar la fábrica de cristal au se construyen a mano dafechu estos coches a la vista de los clientes. Pa facese una idega de lo esclusivo del modelu, la casa cuenta con colocar 400 unidaes en tol mercáu español esti añu. Ensin dulda, un coche que ye la cuenta a metese peles caleyes asturianes a visitar pueblos.